DILI, 24 abríl 2023 (TATOLI)–Institutu Nasionál Estatístika Timor-Leste, Institutu Públiku (INETL, I.P) planeia ona atu halo peskiza kiak iha Timor-Leste.
“Ami planeia atu halo peskiza iha jullu to’o dezembru tinan ne’e,” Prezidente interinu INETL, Élias dos Santos Ferreira hateten iha ámbitu lansamentu relatóriu situasaun populasaun mundiál iha salaun INETL, Caicoli, segunda ne’e.
Tuir dadus, iha tinan 2017 populasaun Timor-Leste kategoriza kiak hamutuk 41%.
“Ita labele haree ema-nia uma a’at, kategoriza ona ema ne’e kiak no labele haree ho matan maibé tenke halo peskiza hodi halo komparasaun. Molok ami halo peskiza sei halo diskusaun ba kuesionáriu, sei uza 75% kuesionér ne’ebé uza iha 2017. Ita halo komparasaun labele halo fali foun,” nia esplika.
Notísia relevante : Peskiza Forsa Traballu 2021 hatudu taxa dezempregu tun ba 5,1%
INETL agora utiliza ona android atu halo serbisu lais liu hodi hatene loloos kiak iha Timor-Leste, nune’e fó ba polítiku na’in sira hodi halo planu ba bein estar povu.
Nune’e, Diretór rekorda, Governu iha tinan 2023 ne’e lansa ona relatóriu forsa traballu, ne’ebé INETL hamutuk ho parseiru sira halo peskiza iha tinan 2021. Relatóriu ne’e hatudu katak taxa dezempregu 5,7% maibé iha sensu populasaun 2022 ne’e sei fó sai taxa dezempregu tanba relatóriu sensu populasaun 2022 sei lansa ofisiál iha maiu tinan ne’e.
Jornalista : Antónia Gusmão
Editora : Julia Chatarina
