DILI, 24 maiu 2023 (TATOLI)—Prezidente Repúblika (PR), José Ramos Horta no Primeiru-Ministru (PM), Taur Matan Ruak hakarak konstrusaun Aeroportu Internasionál Prezidente Nicolau Lobato Comoro tenke realiza ona.
“Ha’u ho Primeiru-Ministru Taur hasoru malu, ami na’in-rua ko’alia buat barak maibé liu-liu kona-ba Governu nia asuntu pendente balun ne’ebé importante atu konklui, hanesan projetu ba konstrusaun Aeroportu Dili tenke ba oin, tanba aeroportu ne’e importante tebes,” PR Horta hateten hafoin ramata reuniaun ho PM, iha Palásiu Prezidensiál, Bairru Pité, kuarta ne’e.
Notísia relevante : Governu hein garantia bankária empreza molok hatuur fatuk dahuluk projetu Aeroportu Comoro
Biban hanesan, PM Taur reforsa katak tuir loloos Governu halo ona lansamentu fatuk dahuluk ba projetu konstrusaun Aeroportu ne’e iha loron hirak liubá.
“Inisialmente planeia atu halo lansamentu iha loron 18 maiu 2023 maibé la konsege no agora ami haree hela dalan, karik sei iha tempu,” nia akresenta.
Governu daudaun ne’e hein hela garantia bankária hosi empreza manán-na’in ba projetu konstrusaun Aeroportu Comoro molok atu hatuur fatuk dahuluk, tanba Governu labele asina uluk kontratu ho empreza tanba sira seidauk fó garantia bankária.
Maski nune’e, Governu iha ona kalendáriu atu realiza serimónia lansamentu fatuk dahuluk ba konstrusaun infraestrutura.
Lansamentu ne’e prevee ona iha loron 16 maiu 2023, maibé enkuantu Governu seidauk asina kontratu ho empreza manán-na’in PT Waskita Karya, maka sei labele realiza lansamentu fatuk dahuluk.
Antes ne’e, Governu define ona prosedimentu aprovizionamentu infraestrutura Aeroportu Comoro, nune’e hafoin liu prosesu naruk, empreza manán-na’in iha rua hosi Indonézia, kompostu hosi PT Waskita Karya sei haree ba konstrusaun infraestrutura ho totál orsamentu millaun $72,5, enkuantu empreza PT Amythas haree liu ba jestaun, ho orsamentu millaun $6,28.
Jornalista : Antónia Gusmão
Editora : Julia Chatarina
