DILI, 26 maiu 2023 (TATOLI)—Prezidente Parlamentu Nasionál, Aniceto Longuinhos Guterres Lopes, hateten haree ba kestaun tempu no se bainhira PN la konsege altera lei pensaun vitalisa iha lejislatura dalimak ne’e mak bele kontinua iha lejistura foun mai.
Notísia Relevante: Reajenda diskusaun alterasaun lei Pensaun Vitalísia hein reuniaun líder bankada
“Loos, ne’e lejislatura foun mai Deputadu sira mak sei hatene. Agora ita-boot husu fali pergunta ba ha’u, tanba kalendáriu Estadu nian nia implika ba lei sira-ne’ebé balun Parlamentu la konsege rezolve nia kaduka. Alterasaun lei pensaun vitalisia bele kontinua iha lejislatura foun mai,” Prezidente Parlamentu Nasionál ne’e hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, sesta ne’e.
Nia hatutan, agora bainhira iha lejislatura foun tama se kaduka ona tenke iha inisiativa foun, la’ós Deputadu de’it maibé Governu mós bele aprezenta proposta.
“Agora iha lejislatura, embora besik hotu ona, ita sei hein lejislatura seluk/ Purtantu, ha’u labele adianta Deputadu sira tuir mai lejislatura sira-nia perspetiva saida,” nia hateten.
Maibé, iha fevereiru 2023 ne’e, Prezidente Parlamentu Nasionál ne’e hateten atu reajenda diskusaun iha plenária faze jeneralidade ba proposta-lei númeru 14/V(2a)-Rejime Jurídiku Seguransa Sosiál Titulár Órgaun Soberania (alterasaun lei Pensaun Vitalísia), sei hein reuniaun lidér bankada Parlamentár sira.
Notísia Relevante: Deputadu maiória lakohi altera lei pensaun vitalísia
“Agora ha’u tenke konsulta, tanba hori bainhira plenária deklara atu fó hikas ba Governu. Maibé ha’u konsulta baze legál sira laiha provizaun ida-ne’ebé klara, esperesamente bele fó dalan atu inisiativa ka proposta-lei ne’e bele fó fila ba Governu. Atu reajenda diskusaun iha plenária ne’e, sei hein reuniaun lidér bankada Parlamentár sira,” Aniceto Longunhos Guterres Lopes hateten ba Agência Tatoli iha PN.
Antes ne’e, iha 2021, Prezidente Parlamentu Nasionál (PPN), Deputadu Aniceto Longuinhos Guterres Lopes, promete sei la budu proposta-alterasaun ba Lei Pensaun Vitalísia (LPV) maibé desizaun ba aprovasaun depende ba plenária.
“Lei pensaun vitalísia mós iha ona Komisaun A maibé oras ne’e Komisaun A sei fó prioridade ba lei sira seluk depois mak sei trata. Iha ha’u-nia mandatu ka iha ha’u-nia prezidénsia, ha’u sei la budu ka rai hela lei iha-ne’e,” Aniceto Guterres informa ba jornalista sira, iha varanda prinsipál Parlamentu Nasionál, kuarta (28 jullu 2021) liubá ne’e.
Prezidente Parlamentu Nasionál ne’e hateten, bainhira tama ona ba diskusaun no deputadu sira konkorda entaun aprova, se la konkorda reaprova.
Notísia Relevante: Aniceto Guterres: “Ha’u sei la budu alterasaun Lei Pensaun Vitalísia”
Jornalista : Nelson de Sousa
Editór : Cancio Ximenes
