VIQUEQUE, 12 juñu 2023 (TATOLI)—Bee Timor-Leste, Empreza Públika (BTL, E.P) munisípiu Viqueque halo ona identifikasaun rekursu bee-matan iha postu Ossu atu dada ba abitante iha postu administrativu Uatulari.
“Foin lalais ne’e ami hamutuk ho ekipa nasionál BTL,E.P halo ona identifikasaun ba rekursu bee-matan hosi Ulu-Ira no Uai-Ua ho débitu 20, lokaliza iha área postu Ossu, maibé ida-ne’e ita presiza halo negosiasaun entre Autoridade Uatulari no Ossu molok kanaliza bee ba postu Uatulari, tanba postu Uatulari ami haree laiha rekursu bee, tanba ne’e tenke foti hosi postu Ossu nune’e hosi parte rua tenke halo komunikasaun,” Koordenadór BTL, E.P, Marito da Costa informa ba Agência Tatoli iha ninia knaar fatin, Beloi, segunda ne’e.
Bazeia ba rezultadu levantamentu dadus tékniku ba bee-matan, nota katak identifikasaun ne’e bele kobre ba populasaun sira iha Uatulari, ne’ebé hela ho nia distánsia kilómetru 15 hosi rekursu ne’e rasik. Bee-moos ne’e ho sistema gravitasaun no sei transforma ba sistema urbana ne’ebé sei monta mós metru kontadór ba benefisiáriu sira.
Notísia relevante : Autoridade Viqueque prioritiza konstrusaun estrada, irigasaun no mellora sitema bee-moos
Daudaun ne’e, abitante hosi suku Matahoi, postu Uatulari konsumu bee-matan hosi parte Edimumu, suku Macadique konsumu rekursu bee-matan hosi Osouake, suku Afaloikai no Uaitame konsumu rekursu bee-matan hosi Kaburia, suku Vessoru uza perfurasaun no suku Bahabulu uza rekursu bee-matan Lulidasu.
“Ami seidauk destaka funsionáriu BTL, E.P atu halo kontrolu distribuisaun bee-moos iha postu Uatulari tanba ami seidauk halo instalasaun, maibé aban bain-rua konstrusaun la’o ona maka ami sei destaka funsionáriu iha ne’ebá,” nia hato’o.
Planu projetu sistema bee-moos ne’e sei benefisia komunidade ne’ebé hela iha aldeia 62, suku neen iha postu administrativu Uatulari, ho totál populasaun 24.391 hosi uma-kain 5.895.
Jornalista : Vitorino Lopes da Costa
Editora : Julia Chatarina
