DILI, 01 jullu 2023 (TATOLI) – Ministru Negósiu Estranjeiru no Kooperasaun (MNEK) Bendito Freitas konsidera presiza reforsa makas iha relasaun internasionál hodi sai pontu asesu ba organizasaun rejionál ASEAN nian.
“Iha MNEK, iha planu estratéjiku ne’ebé define ona, iha ne’ebá ne’e atu reforsu ba ita-nia servisu diplomasia no relasaun internasionál ne’e atu ita bele konsidera pontu asesu ba organizasaun rejionál ASEAN nian ne’ebé sai prioridade ba ita”, Ministru Bendito dehan ba Agência TATOLI hafoin simu posse iha Palásiu Prezidensiál, sabadu ne’e.
Nia dehan, servisu makas ne’ebé nia sei halo iha nia mandatu mak atu lori Timor-Leste rapidamente tama ba membru permanente ASEAN.
“Fundamentál mak tenke haree ministèriu, haree nia reorganizasaun estrutura internu ba prosesu responsabilidade pesoál maibé relasaun internasionál no diplomasia hanesan kampu ida ne’ebé nakloke tebes, presiza servisu hamutuk ho nasaun sira hotu no parseiru sira internasionál, atu Timor-Leste rapidamente tama ba membru permanente ASEAN nian”, Bendito adianta.
Nia hatutan, luta atu sai hanesan membru permanente ASEAN, hahú tempu naruk ona, ho IX Governu ne’e tenke realiza duni mehi ne’ebé durante ne’e seidauk sai realidade.
Iha fatin hanesan, Vise Ministra ba asuntu ASEAN Milena Rangel reforsa katak durante mandatu loron 100 ida sei foku liubá implementasaun roteiru ne’ebé ASEAN fó ba Timor-Leste.
“Iha mandatu ne’e, ita sei foku liubá roteiru ne’ebé iha ona ita-nia liman, ASEAN fó ona ba ita, ba prioridade hitu ne’ebé iha roteiru nia laran, ida ne’e mak ita sei tau prioridade depois mak haree fali buat seluk”, Milena revela.
Nia esplika, iha roteiru ne’e kompostu programa importante hitu mak hanesan servisu atu dudu lalais akordu ekonomia, seguransa, sosiu kulturál, fó vistu ba sidadaun Sudeste Aziátiku sira hanesan nasaun hotu iha ASEAN no seluk tan.
Jornalista: Hortencio Sanchez
Editór : Zezito Silva
