DILI, 05 jullu 2023 (TATOLI) – Ministra Edukasaun, Dulce de Jesus Soares, planeia ona atu identifika graduandu sira ne’ebé hetan prestasaun di’ak iha sira-nian estudu tantu iha rai-laran komu iha rai li’ur atu inklui iha forsa traballu ministériu nian.
Ministériu Edukasaun (ME) sei fó oportunidade ba estudante sira atu hamutuk hodi dezenvolve edukasaun ida ho kualidade iha Timor-Leste ne’ebé mai husi baze.
“Ha’u hakarak hatete katak Ministériu Edukasaun pretende hakat bá oin tenke envolve ita-nian oan sira ne’ebé maka akaba ona sira-nian estudu iha universidade sira, tantu iha rai laran nomós rai-li’ur, maibé tenke hetan kategoria estudante ho kualifikasaun di’ak”, Dulce de Jesus informa asuntu ne’e iha Vila Verde.
Governante ne’e relembra, iha 2015, Timor Leste deklara ona katak la falta profesór, maibé presiza halo jestaun ida di’ak atubele garante katak eskola hotu-hotu iha manorin sufisiente ne’ebé ho kualifikasaun di’ak, tanba ne’e la’ós atu aumenta tan profesór ne’ebé laiha kualidade, maibé presiza iha jestaun ida di’ak atu lori edukasaun atinje nia meta sira.
“Ita atu tau profesór iha eskola sira tenke observa uluk, depois haree mós ninia kualidade. Ida ne’e maka ita presiza atu tau atensaun, ita labele lori ema hotu mai tau iha Ministériu Edukasaun depois laiha kualifikasaun, saida maka nia atu halo ba estudante sira”, ministra kestiona.
Nia afirma tan katak kualidade edukasaun ne’e reflete maneira lubuk ida, maibé dalabarak ema haree liu ba konstrusaun fízika, aumenta edifísiu no sala aula eskola sira, más ema ladún fó atensaun ba kualidade profesór sira-nian. “Será ke estudante ho pursentu hira mak hatene lee, hakerek no hatene ona numerasaun to’o agora? Seidauk iha atensaun di’ak husi Governu”, haktenik.
Molok tinan lima ne’e remata, tuir governante ne’e, iha IX Governu sei halo mudansa ruma iha edukasaun Timor-Leste hodi kontinua tau nafatin atensaun ba profesór sira ne’ebé mai ho memória foun atubele garante prosesu aprendizajen ba estudante sira iha kada eskola ho kualifikasaun ida-idak nian tuir área temátika sira ne’ebé mak sai nesesidade ba eskola no estudante sira atu aprende liután.
Tuir dadus anteriór Ministériu Edukasaun, Juventude no Desportu, eziste iha país manorin hamutuk 10.523 no kontratatu 5.203.
Jornalista: Tomé Amado
Editora: Maria Auxiliadora
