MALIANA, 10 jullu 2023 (TATOLI)-Polísia Nasionál Timor-Leste (PNTL) asegura ona suspeitu na’in-lima ne’ebé deskonfia envolve iha kazu asalta komunidade nia uma iha aldeia Ritabou, suku Ritabou, postu administrativu Maliana, munisípiu Bobonaro.
Kazu refere akontese iha loron-domingu, purvolta tuku 10:00 hafoin konfrontu entre grupu arte-rituál K2000 ho 77.
Segundu Komandante PNTL Munisípiu Bobonaro, Superintendente Asistente Fasio de Jesus Lima, konfirma kazu refere iha hela prosesu identifikasaun nia laran.
Notisia relevante: Konfrontu iha Bobonaro rezulta uma rua hetan estragu
“Parte investigasaun halo hela sira-nia servisu, komandu fó ona serbisu ba sira atu dentro 72 horas nia laran, ita servisu hamutuk ho na’in hira atu asegura prosesu ida-ne’e entrega ba Ministériu Públiku, atu sira-ne’ebé sai autór ba problema ne’e nia bá hatan,” nia hateten iha kna’ar-fatin, iha Maliana, segunda ne’e.
Uma-na’in Natalia Xavier de Aroaújo, haktuir kronolojia katak, iha tuku 10:08 liu iha grupu rua hosi K200 hamriik iha uma oin uza fiska tuda uma, nune’e sira deside sai mai halimar liu de’it menutu balu grupu refere halo kedas asaun hasoru.
“Serang 1 2 3, sira-nia lampu taka hotu no sira tuda ami tesik mai, ami halai fahe malu, ami tama mai oras ida ho balu tuda ami, sira tama mai ne’e ho masa kedas, fatuk sira tuda tarutu, kaer aisuak fai iha janela vidru sira-ne’e, sira hamate meteran ho samurai, horikalan ne’e polísia 5 menit de’it la mai mós ami na’in hitu mate iha kuartu laran,” nia informa ba jornalista sira, iha iha Maliana, segunda ne’e.
Enkuantu antes ne’e iha sábadu kalan, mosu problema entre grupu arte-rituál K2000 ho 77, maibé Natalia dehan, sira laiha problema ruma, tanba nia rasik hanesan funsionáriu Diresaun Nasionál Prevensaun Konflitu Komunitária (DNPKK) ne’ebé rezolve konflitu sira iha munisípiu Bobonaro laran.
Vitima sente triste ho akontesimentu refere no asaun refere halo sira trauma tanba nia oan feto bot foin tuur ahi seidauk to’o semana ida.
Nia haktuir, ho akontesimentu refere sira-nia osan montante rihun $2 ema lori lakon hotu.
“Ha’u-nia oan servisu iha CNE fulan-haat nia simu $800 rai hela, nia ferik-oan hosi Lospalos mai fa’an tán Karau hamutuk $1.500 atu sosa motorizada, ha’u-nia katuas nia osan $500 atu halo rate mós lakon,” nia hatutan.
Jornalista: Sergio da Cruz
Editór: Evaristo Soares Martins
