DILI, 18 jullu 2023 (TATOLI) – Universidade Nasional Timor Lorosa’e (UNTL) entrega espasu iha área universidade ba estudante Fakuldade Ekonomia hodi harii loja kooperativa ho naran Brilha Académica. Kriasaun loja ne’e ho objetivu atu fa’an produtu lokál sira hanesan tais nu’udar patrimóniu kulturál no produtu seluk ne’ebé estudante sira prodús.
Vise-Reitora ne’ebé trata Asuntu Estudantíl, Lígia Tomás Correia, informa katak loja koperativa brilla akadémika ne’e harii tanba inisiativa husi gabinete vise-reitora asuntu estudantíl no konvida mós feto akadémika iha UNTL, alumni no estudante ativu sira hodi estabelese loja refere.
“Koperativa ida ne’e estudante sira harii ho sira-nian fundu rasik, maibé gabinete vise-reitora nafatin orienta sira atu kontinua promove produtu tais, nune’e nafatin valoriza nu’udar patrimóniu kulturál no imateriál ne’ebé UNESCO deside ona nu’udar Timór nia rikusoin. Obra ida ne’e konsidera étniku tebes, tanba ne’e UNTL hakarak sai instituisaun ensinu superiór Estadu ida ne’ebé valoriza tais atu atrai ema seluk”, Lígia Correia hatete ba Tatoli, iha kampus rezende.
Rekorde katak Organizasaun Nasaun Unida ba Edukasaun, Siénsia no Kultura (UNESCO) rekoñese, iha tinan kotuk, tesidu tradisionál tais hanesan patrimóniu kulturál imateriál, ein nesesidade salvaguarda urjente.
Kooperativa “Brilha Académica” aleinde fa’an tais, fa’an mós vestuária sira, sapatu, pasta, lembransa sira ne’ebé estudante sira prodús rasik no kamizola husi li’ur. Produtu sira ne’e la’ós de’it mai husi estudante Fakuldade Ekonomia nian de’it, maibé mós husi Fakuldade Direitu no husi Enjeñaria.
“Loja kooperativa ne’e lataka dalan ba estudante sira seluk atu tau produtu ne’ebé sira prodús. Kuandu ema sosa ona tenke kontribui metade fundu ba loja ne’e atubele selu fali ba ema ne’ebé hein. Ida ne’e maka kritériu ne’ebé kria ona no durante ne’e buat hotu la’o di’ak”, afirma.
Kooperativa ne’ebé kria ona durante tinan rua ne’e iha ona membru hamutuk na’in-40 no mesak estudante ativu de’it.
Ba futuru, gabinete vise-reitora sei buka meiu atu halo treinamentu hodi hasa’e koñesimentu membru permanente iha koperativa ne’e rasik, nune’e bele tulun sira sai jestór di’ak hodi lori loja ne’e bá oin.
Jornalista: Tomé Amado
Editora: Maria Auxiliadora
