DILI, 20 jullu 2023 (TATOLI)—Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) hasai ona ekipamentu pezadu ne’ebé mout iha mota Sumaku iha suku Uma-Tolu, postu administrativu Lacluta, munisípiu Viqueque, no iha tempu hanesan normaliza ona mota.
“Loos duni, iha loron (16/07) ekipamentu loader hosi IGEADE, I.P ne’ebé atu normaliza mota Sumaku ne’ebé kotu mout ba mota, maibé loron tuir mai ita-nia ekipa tun terrenu hodi hasai no normaliza kedas mota , agora komunidade iha área ne’ebá bele asesu ona dalan ho di’ak,” Prezidente Konsellu Administrasaun IGEADE, I.P, Hermenegilda da Costa Laurentina, informa ba Agência Tatoli, via telefónika, kinta ne’e.
Notísia relevante : Ekipamentu IGEADI, I.P mout iha ponte Sumaku Uma-Tolu Lacluta
Mákina pezadu ne’ebé mout hosi IGEADE, I.P nia Brigada Daitula ne’ebé destaka iha Baucau.
Institutu antes ne’e lansa Brigada sira iha loron 16 janeiru 2023, ho objetivu atu atende ba situasaun emerjénsia sira ne’ebé akontese iha terrenu. Brigada hamutuk neen, ne’ebé kada Brigada sei resposabiliza ba munisípiu tolu, hanesan Brigada Daitula kobre ba munisípiu Baucau, Viqueque, Lautém, Brigada Rosa Muki Bonaparte kobre Manatuto, Manufahi, Ainaro, Brigada Maria Tapo kobre Bobonaro, Covalima, no Ermera.
Nune’e mós, Brigada Samba 9 kobre Aileu, Liquiçá no Dili sorin, no Brigada Sebatião Gomes nu’udar Brigada rezerva ne’ebé servisu iha Dili laran hodi haree servisu emerjénsia sira ne’ebé iha Dili-laran, nune’e mós ekipa taskforce ne’e rasik hanesan operasionál sei lidera atividade sira hanesan mobilizasaun no dezmobilizasaun hosi Dili ba munisípiu no munisípiu ba munisípiu atu halo atividade mobilizasaun ekipamentu pezadu ba Brigada destakadu sira.
Movimentu iha ponte Sumaku la’o normál ona
Iha sorin seluk, Xefe suku Uma Tolu, agradese ba IGEADI, I.P tanba konsege rezolve ona situasaun ne’ebé impede movimentu ema no transporte.
“Ponte Sumaku kotu durante semana ida resin, nune’e difikulta movimentu transporte públiku sira iha Lacluta, maibé agora movimentu la’o di’ak ona. Ha’u agradese ba parte IGEADI, I.P ne’ebé mobiliza ona ekipamentu mai Lacluta hodi normaliza ponte, nune’e bele fasilita movimentu. Daudaun ne’e ekipa IGEADI, I.P kontinua destakadu iha ponte Sumaku Uma-Tolu hodi akompaña ponte ne’e,” Xefe suku Uma Tolu, Jacinto Ximenes, hateten.
Nia dehan, ekipa halo normalizasaun uza rai no rai henek maka aterru, nune’e tempu udan posibilidade bele estraga fali, tanba ne’e presiza halo manutesaun ponte ne’e.
“Maski IGEADI, I.P halo normalizasaun ona, maibé sei la dura ba tempu naruk tanba aterru rai no rei henek, ne’ebé bainhira tempu udan mota sei sobu filafali. Tanba ne’e ami autoridade husu Governu sentrál hodi tau orsamentu ba manutesaun ponte Sumaku, labele aterru de’it hanesan ne’e,” nia akresenta.
Ponte Sumaku lokaliza iha suku Uma Tolu, liga ho postu Lacluta ho suku Ahic, Dilor, no Laline.
Jornalista : Arminda Fonseca/Vitorino Lopes da Costa
Editora : Julia Chatarina
