MALIANA, 24 jullu 2023 (TATOLI)-Abitante sira iha postu administrativu Cailaco, munisípiu Bobonaro, husu Primeiru Ministru (PM), Kay Rala Xanana Gusmão, kumpre promesa durante períodu kampaña eleitorál ne’ebé hato’o katak bainhira ba Lidera IX governu tau prioridade atu hadi’ak estrada urbana ligasaun hosi Maliana ba Cailaco no postu administrativu Gleno, munisípiu Ermera.
Verónica Soares, nu’udar abitante suku Golulo, hato’o ezijénsia ne’e tanbá Xefe governu haree rasik ona ho matan kondisaun estrada refere.
Notísia Relevante:MOP presiza aselera projetu estrada urbana Cailaco
“Nia liuhosi ne’e ami hapara, ami dehan, Avo Nana ami la presiza buat seluk, ami presiza mak estrada ne’e de’it, tanba estrada ne’e aat loos, ne’ebé to’o kampaña Avo Nana hateten, estrada Cailaco mai to’o Maliana hanesan ita la sae karreta, maibé ita sa’e kuda deit,vne’ebé agora avo Nana mós Primeiru Ministru ona,” nia informa ba Jornalista sira iha Cailaco, segunda ne’e.
Nune’e mós Lourenca Maia, sente triste hare ba estrada refere, tanba kondisaun aat grave kuaze tinan barak ona, maibé to’o ohin loron governu seidauk hadi’ak.
Tur nia, kondisaun estrada ne’e difikulta sira atu lori produtu lokál asesu ba merkadu Maliana atubele hetan osan atu sustenta oan sira-nia nesesidade bázika.
“Ami nia-oan sira ba eskola, agora modelu dehan buat hotu-hotu matéria ne’e fotokopia hotu de’it, agora ami lori sasán atu ba fa’an mós estrada ladi’ak, lakleur sira telefone mai dehan osan ba fotokopia, entaun udan ne’e ita ba araska loos, ne’ebé ami husu ba governu foun atu hadi’ak ami-nia dalan ne’e,” nia sujere.
Xefe aldeia Suri-Ubu, asuku Goulolo, Ernesto Soares, konfirma durante ne’e autoridade lokál sira hato’o beibeik ona proposta ba governu lokál no nasionál, maibé to’o agora laiha rezultadu.
“Ami husu ba governu atu aselera lalais ninia prosesu, atu komunidade sira bele lori sira-nia produtu lokál ba merkadu ho di’ak, sé lae araska, tempu udan bainhira mota oan sira-ne’e tún, pasiénsia karreta la ba,” nia katak.
Notísia relevante: Rai-rahun falun estrada Cailaco provoka komunidade sofre moras IRA
Jornalista: Sérgio da Cruz
Editór: Evaristo Soares Martins
