DILI, (TATOLI) – Ministru Justisa, Manuel Cárceres da Costa, hatete governu liuhosi Ministériu Justisa (MJ) iha ona planu atu reforma ba kurríkulu ne’ebé sentru formasaun jurídiku iha hodi fó formasaun di’ak liután ba jurista sira.
Nia haktuir ministériu oras ne’e halo ona prosesu revizaun ba dekretu lei ne’ebé define rekrutamentu ba formandu sira depois maka kontinua ho reforma kurríkulu.
Maibé reforma ne’e sei akontese depois governu halo ona revizaun ba dekretu governu ne’e iha tempu besik.
“Buat ida ne’ebé la adekuadu ona ho ita nia evoluzaun, entaun ita tenke altera para ita bele akompaña evoluzaun sosiedade”, dehan ministru ba Tatoli iha Palásiu Governu, ohin.
Liuliu oinsá atu reforsa apoia hodi hadi’a kondisaun sentru formasaun, hanesan ekipamentu no rekursu umanu hodi dezenvolve di’ak liután setór justisa.
“Agora ita nia konsentrasaun ne’e maka formasaun kualidade, ne’ebé kurríkulu sira ne’ebé la apár ho ita nia dezenvolvimentu tuir evoluzaun sosiadade”, tenik tan.
Kurríkulu ne’ebé durante ne’e sentru formasaun uza Timor nian ne’ebé hakerek ho lian-portugés maibé presiza hadi’a kontiúdu balun.
Entretantu rekursu umanu iha sentru formasaun naton, maibé governante la sita ema nain hira.
Jornalista: Agapito dos Santos
Editora: Rita Almeida
