DILI, 07 agostu 2023 (TATOLI) – Ministra Edukasaun, Dulce de Jesus, no Embaixadór Koreia Súl iha Timor-Leste, Shin Mantaek, diskute asuntu sobre kapasitasaun rekursu umanu iha Eskola Sekundária Tékniku Vokasionál-Grupu Teknolojia Indústria (ESTV-GTI) Becora. Parte rua ne’e hakarak dezenvolve di’ak liután eskola refere iha futuru.
Kapasitasaun rekursu umanu ne’e sei foka ba formasaun língua koreana no formasaun téknika espesífika sira kona-ba utilizasaun ekipamentu sira ne’ebé instala iha eskola refere.
“Ministériu rasik sei haruka mós nia ekipa sira atu bá halo identifikasaun iha eskola refere hodi buka hatene liután nesesidade saida maka eskola ne’e presiza bainhira hetan apoia husi Koreia”, ministra Dulce de Jesus hatete iha Vila Verde, ohin.
Governante ne’e realsa katak Embaixadór Koreia promete ona katak sira hakarak serbisu hamutuk ho Ministériu Edukasaun atu tau atensaun ba ESTV Becora, nune’e bele aselera funsionamentu iha eskola refere.
“Kooperasaun ne’ebé maka Ministériu Edukasaun no Koreia diskute daudaun ne’e foka ba asuntu rua maka produsaun livru sira ne’ebé halo ona distribuisaun no seluk mak hakarak dezenvolve Eskola Sekundária Tékniku vokasionál Becora”, reitera.
Embaixadór koreanu, Shin Mantaek, haktuir kooperasaun ne’ebé parte rua diskute ne’e atu haree ba rekursu umanu iha ESTV Becora, tanba eskola tékniku sira sei sai fatór determinate ida iha futuru atubele garante dezenvolvimentu nasaun ida nian.
“Ami prontu apoia Timor-Leste liuhusi kooperasaun ho Ministériu Edukasaun, tanba ami iha esperiénsia boot kona-ba oinsá atu dezenvolve eskola tékniku iha ami-nian rain. Ami sei halo planu ida di’ak depois sei mai halo aprezentasaun ba Ministra Edukasaun”, promote.
Rekorde katak Diretór ESTV Becora, Feliciano Belo, antes ne’e husu Ministériu Edukasaun atu apoia ekipamentu, liuliu iha konstrusaun sivíl no karpitaria atu fasilita alunu sira halo prátika.
“Durante ne’e ami hato’o ona proposta ba Ministériu Edukasaun (ME) atu husu apoiu orsamentu hodi sosa ekipamentu foun ba prátika nian atu tulun estudante sira, maibé Governu dehan osan laiha. Ne’e duni ami-nian proposta orsamentu ne’e la konsege realiza”, dirijente informa foin lalais ne’e, iha Becora.
Nune’e Feliciano Belo husu ba IX Governu, liuhusi Sekretáriu Estadu Ensinu Sekundáriu no Eskola Téknika (SEESET) atu iha loron 120 ne’e bele tau prioridade hodi apoia materiál foun ba eskola refere.
Ekipamentu ne’ebé eskola ne’e presiza mak hanesan mákina supila moderna no manuál, meza ba prátika no seluk tan.
Notísia relevante: ESTV Becora husu Ministeriu Edukasaun apoia ekipamentu prátika ba alunu sira
Jornalista: Tomé Amado
Editora: Maria Auxiliadora
