BAUCAU, 07 agostu 2023 (TATOLI) – Sidadaun feto inisial JR idade 64 lakon vida bainhira trata dokumentu sertidaun Repúblika Demokrátika Timor-Leste (RDTL) iha Servisu Munisipál Rejistu Notariadu no Konservatóriu Notariadu Baucau.
Família hosi saudoza, Domingos Julião dos Reis, esplika, tuir kronolojia to’o iha notariadu Baucau hamutuk ho inan (saudoza) no deskansa iha fatin mahon hodi hein prosesu atendimentu, maibé purvolta oras 10:00 monu baku fila no kontinua evakua ba Ospitál Rejionál Eduardo Ximenes( HorEX, sigla portugés).
“Ha’u haree mamá baku fila no liman-ain to’os entaun ho ta’uk ha’u husu ajuda ba membru Polísia Nasionál Timor-Leste sira transporta ba ospitál hodi halo atendimentu hanesan uza soru no bomba maibé lakleur mamá ikus kotu,” Domingos dos Reis hateten iha HorEX, Vila Nova, segunda ne’e.
Saudoza hamutuk ho la’en kaben no oan hosi suku Abafala, aldeia Carnu, postu administrativu Quelicai, purvolta oras 06:00 no to’o iha notariadu Baucau purvolta 07:00, nune’e informa kedas ba parte seguransa atu atende uluk maibé seidauk iha atendemintu saudoza evakua ba ospitál tanba kondisaun saúde.
“Ha’u husu atu mamá uluk maibe parte seguransa dehan atende uluk lai númeru mak foin konfirma lai ba funsionáriu sira mak fo resposta,” Domingos do Reis haktuir.
Domingos dos Reis lamenta ho prosesu atendimentu iha Servisu Munisipál Rejistu Sivíl no Notariadu Baucau nune’e husu ba futuru bele hakbesik ba suku nune’e fo prioridade ba idozu ka idoza sira no ema ho defisiénsia.
Mediku jerál emerjensia HorEX Baucau, Basilia dos Santo Freitas, hateten, pasiente mai ho kondisaun monu, maske halo ona atendimentu hafoin monu iha notariadu Baucau.
“Familia la hatene kronolojia moras, entaun ami suspeita pasiente moras fuan,” Basilia Freitas akresenta.
Prezensa saudoza JR iha notariadu Baucau ho objetivu atu trata dokumentu sertidaun RDTL hodi kontinua ba Billeti Identidade (BI) atu simu subsídiu idozu tanba mundansa dokumentu.
Jornalista : Natalino Belo
Editór : Evaristo Soares Martins
