DILI, 08 agostu 2023 (TATOLI) – Sekretáriu Estadu Komunikasaun Sosiál (SEKOM), Expedito Dias Ximenes, hateten SEKOMS no UNICEF sei asina memorandu entendimentu hodi mantein kooperasaun hodi promove direitu labarik no uza internet saudável.
“Tempu badak UNICEF ho SEKOMS sei asina MoU kona-ba implementasaun programa rua ne’e”, Expedito Dias ba jornalista sira hafoin konklui enkontru ho reprezentante UNICEF iha Timor-Leste, Palásiu Governu, tersa ne’e.
Governante ne’e, dehan promovosaun direitu labarik ne’e importante atu konsensializa labarik sira bele konsumu ai-han nutritivu.
Tanba ne’e, mak UNICEF nia presenza mai iha SEKOMS atu husu SEKOMS kontinua servisu hamutuk atu promove direitu labarik iha Timor-Leste liuhosi uza plataforma Governu nian ne’ebé iha mídia estatál sira hanesan Rttl,Ep ho Agência Tatoli, hodi bele dezamina informasaun kona-ba direitu labarik nian, liuhosi eskola sira fó hahán ne’ebé nutritivu.
“Atu labarik sira labele hetan má-nutrisaun, inklui dezaminasaun mós kona-ba saúde di’ak, no edukasaun ho kualidade, hahú hosi ensinu báziku to’o ensinu superiór atu labarik hirak ne’e bele sai futuru nasaun ida ne’ebé ho kualidade”, nia revela.
Expedito hateten, SEKOMS ho UNICEF promove internet saudavél tanba labarik adapta ho teknolojia no erra dijitál, dala barak labarik sira uza internet livre loos, liuhosi telefone android ne’ebé iha pontu pozitivu no mós iha pontu negativu,.
“Nune’e, ohin UNICEF mai atu halo kooperasaun no servisu hamutuk ho SEKOMS oinsá bele kria Internet saudável, katak labarik sira iha ensinu Primaria no Ensinu Sekundáriu, tenke uza internet ne’e hodi asesu ba disipliña ho di’ak”, nia informa.
“La’os uza internet atu prejudika sira hodi asesu ba síitiu sira ne’ebé violénsia no pornografia sira, ida ne’e mak presiza evita”, nia adianta.
Tanba ne’e mak UNICEF servisu hamutuk ho SEKOMS atu bele fó treinamentu ba labarik sira no joven sira atu bele uza internet ho di’ak.
“Iha erra dijitalizasau internet hanesan fatór importante hodi bele forma estudante sira bele sai futuru ne’ebé di’ak”, nia adianta.
Iha fatin hanesan, Reprezentante UNICEF iha Timor-Leste Bilal Aurang Zeb Durrani, hateten vizita UNICEF mai SEKOMS hanesan onra bo’ot ida kona-ba direitu labarik iha Timor-Leste.
“Ami mós orgullu servisu hamutuk ho Governu liuliu rádiu komunidade hodi prodúz programa kona-ba direitu labarik iha rádio sira no mós Agência Tatoli, Rttl.Ep, hodi disemina informasaun kona-ba direitu labarik nian”, nia dehan.
“Ami mós kolia kona-ba koopersaun iha área Internet saudavél ba foinsa’e sira no fó formasaun ba foinsa’e sira oinsá bele uza Internet ho loloos”, nia afirma.
Reprezentante UNICEF agradese tanba bele hasoru malu ho SEKOMS hodi hametin kooperasaun iha futuru.
“Ami mós agradese ba SEKOMS tanba bele desponibiliza nia tempu hodi halo enkontru ho ami, nune’e bele kontinua ita-nia koopersaun ba futuru”, nia konklui.
Jornalista: Natalino Costa
Editór : Zezito Silva
