DILI, 09 agostu 2023 (TATOLI) – Ekipa segunda divizaun Liga Futsal Timor-Leste Académica FC susesu iha nia jornada hodi manán nia adversáriu Crazy Horse ho rezultadu mihis 3-2.
Jogu ba ekipa rua realiza iha kampu Futsal Falintil-Forsa Defeza Timor-Leste (F-FDTL) Fatuhada Dili, kuarta kalan.
Bainhira árbitru fó orientasaun, jogu komesa no ekipa rua hatudu kedan sira-nia forsa no abilidade liuhosi kontra no atake ba malu ho tékniku ne’ebé diferente.
Hosi kontra no atake ne’e, Académica domina uluk bola iha menutu tolu, jogadór Filipe Martins lansa kedan golu primeiru muda rezultadu ba 1-0.
Hosi golu ne’e, halo Crazy Horse la tur nonok maibé ho ambisaun makas hodi lansa kontra hasoru iha menutu 15, jogadór Romario Roberto rezolve golu ida muda rezultadu ba 1-1.
Golu ne’e provoka jogu la’o manas liután iha menutu 28, jogadór Académica Isaac dos Santos marka golu ida hodi muda rezultadu ba 2-1. Kontra no atake manas liután iha menutu 33, jogadór Joãozinho Pinto les golu ikus hodi hatur rezultadu ba 3-1.
Maske Académica domina bola maibé Crazy Horse la nonok hatudu nafatin jogu ho esperansa iha menutu 39, Natalino Fernandes halo golu ida muda rezultadu ba 2-3.
Hosi golu ne’e mak termina jogu ba ekipa rua to’o ikus vitória hela ba Académica no Crazy Horse obrigadu tenke simu derrota no hein fali jogu sira tuir mai.
Jornalusta: Hortencio Sanchez
Editór : Zezito Silva
