DILI, 14 agostu 2023 (TATOLI)—Prezidente Repúblika, José Ramos Horta, no Sekretáriu Estadu ba Igualdade (SEI), segunda ne’e, inaugura loja rede soru-na’in iha Pateo, Dili, ne’ebé organiza hosi UN Woman iha Timor-Leste.
Xefe UN Women iha Timor-Leste, Amy Nishtha Satyam, hateten ida-ne’e hanesan loja rede soru-na’in dahuluk ne’ebé na’in no jere ona hodi fó kbiit ba ekonomia rurál no atu proteje tradisaun riku ida-ne’e.
“Bainhira iha área rurál sira-ne’e di’akliu atu asesu ba sira-nia direitu ekonómiku no oportunidade moris nian. UN Women Timor Leste hamriik iha nia kompromisu atu apoiu feto sira hanesan sub-grupu, liuliu marjinalizadu. Loke loja Rede Soru Na’in nu’udár momentu importante ida hodi apoia feto sira-nia kondisaun moris no prezerva arte tais nian,” Xefe UN Women iha Timor-Leste ne’e hateten, iha serimónia lansamentu merkadu tais iha Pateo, segunda ne’e.
Nia hatutan, loja rede soru-na’un ne’e hanesan fatór importante ida iha esforsu Governu no parseiru dezenvolvimentu sira-nian iha nasaun ne’e, atu hametin feto sira-nia asosiasaun no mós atu proteje no promove arte tradisionál tais nian iha Timor-Leste.
Loja ida-ne’e simboliza buat ne’ebé feto sira bele hetan bainhira fornese kapasidade, oportunidade no asesu ba merkadu, no ida-ne’e sei hatudu tais, produtu no artezanatu sira-ne’ebé halo hosi artezanatu feto sira.
Vizitante sira hosi loja rede soru-na’in sei hetan oportunidade atu esplora kolesaun oioin iha tais nian, hatudu dezeñu oioin hosi rejiaun oioin iha Timor-Leste, nune’e mós produtu sira seluk ne’ebé prodús hosi artezanatu feto sira.
Loja ne’e iha kompromisu atu hasa’e apresiasaun no kompreensaun kle’an liután kona-ba tais, hodi konvida vizitante sira atu liga ho artezanatu sira-ne’ebé iha artezanatu nia kotuk.
Konvidadu sira sei iha priviléjiu atu halo interasaun ho feto sira-ne’e balun no hetan koñesimentu kona-ba sira-nia prosesu kreativu no viajen pesoál.
Harii tuir Planu Nasional Seguransa Tais nian, ho esforsu koletivu hosi UN Women, Timor Aid, no Fundasaun Alola, Rede Soru-Na’in mak rede ida hosi tais iha Timor-Leste laran tomak.
Timor Aid Advisor, Joana Pinto Coelho, hateten Rede Soru Na’in nia misaun mak atu proteje no promove arte tradisionál tais iha Timor-Leste, haforsa komunidade arte-na’in sira-ne’ebé iha esperiénsia no kria arte-na’in ida.
“Feto sira sai nu’udar lian koletivu ida-ne’ebé advoka ba sira-nia interrese no direitu, enkuantu foka liu ba merkadu no produtu oioin. Liuhosi inisiativa alvu no programa dezenvolvimentu abilidade, asosiasaun ne’e buka atu kria meiu moris sustentavél ba feto rurál sira no mós atu proteje patrimóniu kulturál riku nasaun nian ba jerasaun sira iha futuru,” nia dehan.
Jornalista : Osória Marques
Editór : Cancio Ximenes
