OÉ-CUSSE, 17 agostu 2023 (TATOLI – Jornalista 26 mai hosi rádiu komunidade munisípiu 12 inklui Oé-Cusse no Atauru hamutuk ho mídia nasionál sira, kuarta ne’e kompleta ona formasaun ho matéria prinsipál 10 kona-bá ‘Journalism Fundamentals Training’ iha Rejiaun Administrativa Espesiál Oé-Cusse Ambeno (RAEOA).
Notísia relevante: Jornalista 24 tuir formasaun loron tolu hosi CITL-ABCID iha Oé-Cusse
Matéria prinsipál 10 ne’ebé jornalista na’in-26 aprende durante loron tolu, hahú segunda 14 to’o kuarta 16 agostu 2023 iha salaun Dominikana, Oé-Cusse.
Iha loron dahuluk, aprende matéria rua (2) primeiru kona-bá papél jornalista, saida mak notísia no buka istória, reportajen justu, balansu, akurasia, no balansu, daruak kona-bá kode étika jornalista Timor-Leste.
Loron daruak, aprende matéria haat (4) primeiru kona-bá abilidade peskiza, maneira no tékniku entrevista, kria rasik ajenda setting ka planu kobertura, daruak kona-bá preparasaun no prátika entrevista, oinsá hakerek notísia ho istilu pro-ativu no reativu, verifika faktu ho estrutura istória ho hanoin krítiku hanesan jornalista klareza nafatin integridade nomós kredibilidade.
Matéria datoluk maka hanoin kona-bá diversidade, matéria dahaat kona-bá estilu oinsá hakerek iha plataforma mídia online, rádiu no televizaun, ho rigoroza akurasia, notísia akontesimentu, notísia faktuál no koutasaun.
Loron ikusliu maka aprende materia haat (4) kona-bá, reportajen violénsia bazea ba jéneru, tékniku foti foto, vídeo uza telefone inklui hakerek iha plataforma mídia sosiál, no oinsá asesu no hakerek komunikadu imprensa.
Prezidente Konsellu Imprensa Timor-Leste (CI, sigla portugés), Otelio Ote, informa, kona-bá formasaun jornalista sira, CI servisu hamutuk ho Austrálian Broadcasting Corporation Departementu Dezenvolvimentu Internationál (ABC-ID) ba dalarua, primeiru formasaun realiza iha nasionál formasaun daruak iha Oé-Cusse.
“Formasaun sira-ne’e importante tebes atu eleva kapasidade tékniku no kapasidade profisionál, no kapasidade intelektuál ba jornalista sira, bele aumenta koñesimentu tanba prátika, loron-loron ita halo ona, maibé buat balu ita la-konsege hatene, ita-bele aprende-tán liuhosi formasaun sira-ne’e,” Otelio Ote ko’alia iha ámbitu atribuisaun sertifikadu ba jornalista sira iha Salaun Dominikana, Oé-Cusse.
Formadór hosi ABCID, Michael Coggan, orgullu bele hamutuk ho jornalista timoroan durante formasaun loron tolu bele kompleta ba malu kona-bá servisu jornalizmu nian.
“Liuhosi sorumutu iha formasaun ne’e, ita bele fahe esperiénsia ba malu, fiar katak sei ajuda jornalista sira atu di’ak liután no sai ema ne’ebé ho koñesimentu di’ak iha futuru,” nia orgullu.
Notísia relevante: CI atribui karteira profisionál ba jornalista na’in-hitu iha RAEOA
Jornalista : Abílio Elo Nini
Editór : Evaristo Soares Martins
