OÉ-CUSSE, 18 agostu 2023 (TATOLI – Projetu Eskola Bázika Filiál (EBF) ne’ebé Autoridade Rejiaun Administrativa Espesial Oé-cusse Ambeno (RAEOA) konstrui iha Ulaslama, suku Taiboko, sub-rejiaun Pante Makasar, nia progresu fíziku atinje ona 100%.
Konstrusaun projetu ne’e, lansa iha agostu 2022 tuir loloos kompañia tenke entrega ba Autoridade iha dezembru to’o janeiru 2023, maibé tanba udan difikulta kompañia atu ezekuta tuir termu kontratu.
Prezidente Autoridade RAEOA, Arsénio Paixão Bano, informa, iha fulan-fevereiru 2023 autoridade RAEOA hamutuk ho tékniku sira hosi Diresaun Rejionál Infraestrutura no tékniku sira hosi Diresaun Edukasaun hala’o fiskalizasaun, progresu atraza tanba foin atinje 50%, nune’e autoridade fó xamada ba kompañia atu kontinua kompleta konstrusaun ne’e ba 100%.
“Horsehik ita fali haree, iha mudansa ona, agora nia servisu ne’e kompleta ona ba 100% hein de’it atu estrega ba Autoridade para komunidade sira bele uza ona, ita agradese ba kompañia tanba kumpre orientasaun ne’ebé antes ne’e ita propoin,” Arsénio Bano ba Tatoli iha Oé-Cusse, sesta ne’e.
Nia hatautan, iha vizita ne’e mós atu hare kondisaun estrada sira, tanba projteu ne’e rasik sei hetan inagurasaun iha tempu badak, inaugura hosi Prezidente Repúblika José Ramos Horta.
“Prezidente Repúblika sei atu halo inaugurasaun ba eskola hira kedas, hanesan ida mak EBF Ulaslama ne’e, EBF Faotkenfua iha Nítibe, EBF Palsam Passabe, no sei inaugura mós kanalizasaun bee-moos ida iha Ulaslama ne’e rasik,” nia informa.
Xefe Suku Taiboko, Joaquim Tafin, agradese ba kompañia, tanba kumpre orientasaun hosi Autoridade hodi kontinua obra ne’e ho susesu.
“Konstrusaun ne’e importante tebes iha ha’u-nia suku liuliu iha aldeia Ulas iha bairru rua, fatin ne’e izoladu tebes no dook hosi eskola, agora Autoridade halo ona eskola iha-ne’e, ami nu’udar Autoridade lokál, sente kontente tanba foin primeiru-véz autoridade harii fasilidade eskola ida atu tulun ami-nia oan sira atu asesu eskola ho besik, tanba durante ne’e oan sira atu eskola tenke ba Kiusisu hakat mota, entaun ho eskola foun ne’e sei tulun tebes ami-nia oan sira,” nia orgullu.
Projetu EBF Ulaslama ne’e ezekuta hosi kompañia Bahalaco Unipesoál, Lda, ho númeru kontratu 58/2022/PA/RAEOA-ZEESM, ho valór kontratu hamutuk rihun $58,760.11, Autoridade RAEOA aloka hosi Orsamentu Jerál Estadu (OJE) 2022 nian ho durasaun servisu durante fulan haat, hahú agostu to’o dezembru 2022.
Notísia reelevante: PA RAEOA husu kompañia Huno Bahalaco tenke finaliza projetu eskola iha Taiboko
Jornalista: Abílio Elo Nini
Editór: Evaristo Soares Martins
