DILI, 22 Abríl 2026 (TATOLI) – Enkarregadu Negósiu Vietname iha Timor-Leste, Pham Binh Dam, hasoru malu ho Prezidente Repúblika, José Ramos-Horta, hodi aborda relasaun bilaterál no kooperasaun ih área estratéjika oioin.
Hafoin enkontru, Pham Binh Dam hateten onra boot ida ba nia hodi asumi knaar nu’udar xefe misaun rezidente dahuluk Vietname nian iha Timor-Leste, hodi destaka ezisténsia relasaun istórika no besik entre povu rua ne’e.
“Governu no povu Vietname iha aspirasaun ne’ebé kle’an no iha relasaun ne’ebé naruk ho povu Timor-Leste. Ami apoia ona Timor-Leste iha ninia luta ba independénsia, nune’e mós iha ninia esforsu ba dezenvolvimentu no integrasaun internasionál no ba iha Asosiasaun Nasaun sira Sudeste Aziátiku [ASEAN]”, Pham Binh Dam hateten iha Palásiu Prezidénsial Bairru Pité, Dili.
Iha audiénsia ne’e, diplomata felisita mós Timor-Leste nia adezaun ba ASEAN, hatudu kompromisu Vietname nian hodi kolabora ho Estadu-membru sira seluk hodi apoia prosesu integrasaun nasaun nian, nune’e mós Timór nia Prezidénsia ba ASEAN iha 2029.
Durante audiénsia ho Xefe Estadu, responsavel vietnamita haktuir kompromisu nasaun nian mak kontinua tulun Timor-Leste ba iha esforsu sira ba dezenvolvimentu nian, nune’e mós iha reforsu ba integrasaun rejionál no internasionál.
Destaka mós vontade atu aprofunda kooperasaun bilaterál iha polítiku, diplomátiku, no ekonómiku.
Tuir Pham Binh Dam, futuru embaixada vietnamita iha Díli tenke funsiona hanesan plataforma koordenasaun ida ho ministériu, instituisaun, no entidade sira seluk, ho hanoin atu hala’o inisiativa hamutuk ne’ebé prodús benefísiu konkretu ba povu rua ne’e.
Iha setór agríkola, diplomata ne’e hatete katak Vietname iha intensaun atu estabelese hanesan parseiru “viável no “komprometidu” iha fornesimentu produtu agríkola sira, nomeadamente foos, hodi kontribui ba seguransa alimentár iha Timor-Leste.
“Ami prontu atu estabelese akordu ne’ebé estavel no ba tempu naruk ba fornesimentu foos, enkuantu fó apoiu ba Timor-Leste iha dezenvolvimentu setór agríkola rasik, ho objetivu atu alkansa autosufisiénsia ai-han ba tempu naruk”, nia subliña.
Diplomata ne’e mós haktuir katak, iha enkontru ne’e, Xefe Estadu hatudu vontade hodi hametin relasaun ho Vietname, hatudu dezeju atu konta nafatin ho nasaun ne’e nia apoiu iha área sira hanesan agrikultura, edukasaun no prosesu integrasaun ba iha ASEAN.
Jornalista: Arminda Fonseca
Editora: Maria Auxiliadora
