DILI, 22 setembru 2023 (TATOLI) – Traballadór timoroan hamutuk 100-resin asina deklarasaun ho Governu ne’ebé akompaña hosi família hafoin dezloka ba servisu iha Austrália iha tempu besik.
Iha atividade asina deklarasaun ne’e, partisipa direta hosi Vise-Primeiru Ministru Mariano Assanami Sabino enkoraza traballadór sira atu ba servisu ho responsabilidade atu kontribui ba hadia moris no hadia nasaun ida-ne’e.
“Servisu saida de’it mak imi halo iha ema nia nasaun parte ida katak imi ne’e aswain kontinuadór, tanba hosi imi-nia servisu no esforsu tomak hatama osan mai ita-nia nasaun”, Assanami dehan hafoin remata asina deklarasaun ho traballadór sira iha Timor Logde, ohin.
Nia dehan, Governu esforsu hela atu kria kampu traballu ba joven sira ho saláriu ne’ebé di’ak atu ema hotu bele muda mentalidade hodi servisu hakas aan makas atu hadia ema hotu nia moris.
“Imi-sira agora ba rai-liur, fiar imi-nia aan katak servisu ne’ebé imi halo fó kontribuisaun boot ba família no ba nasaun. Kampu servisu, ba futuru sei nafatin eziste rai-liur no laran, ba rai liur ne’e atu buka esperiénsia”, nia hatete.
Nia husu ba traballadór sira hotu atu respeitu Austrália nia lei ne’ebé estabelese ona atu hatudu imajen di’ak Timor-Leste nian iha ema nia rai.
Iha okaziaun ne’e, Sekretáriu Estadu Profesionál no Empregu (SEFOPE) Rogério de Araujo Mendonça husu ba traballadór sira bainhira ba servisu labele halai sai hosi sistema tanba ne’e bele fó impaktu ba kooperasaun entre nasaun rua nian iha futuru.
“SEFOPE sei esforsu atu redúz traballadór timoroan sira atu labele sai hosi sistema, ami sei servisu hamutuk ho Embaxadór Austrália nian iha ne’e no Embaxadór Timor-Leste nian ba Austrália atu haree meiu saida mak ba oin atu kria ba traballadór sira nune’e labele sai hosi sistema”, Rogério hateten.
Husu ba traballadór sira ne’ebé agora atu ba servisu iha Austrália, simu konfiansa hotu ho responsabilidade atu tane aas interese Estadu Timor-Leste nian.
“Ohin ita-boot sira asina deklarasaun hamutuk ho ita-boot sira-nia família no Estadu Timor-Leste, demostra imi-nia nasionalizmu atu sai sidadaun di’ak hanesan eroi foun ba nasaun ida ne’e atu redúz ki’ak no mukit iha nasaun ne’e”, nia dehan.
SEFOPE husu nafatin ba traballdór sira ne’ebé hetan ona oportunidade atu mantein hahalok di’ak atu labele taka dalan ba timoroan seluk ne’ebé sei tuir tan.
Traballadór sira ne’ebé asina ona deklarasaun atu ba servisu iha Austrália sei servisu iha área hanesan ortikultura, indústria no seluk tan.
Tuir dadus, iha 2012-2023 traballadór timoroan hamutuk na’in 11. 528, hosi númeru ne’e mane na’in 8,156 no feto na’in 3.372.
Traballadór timoroan ne’ebé durante ne’e halai sai hosi sistema iha Austrália hamutuk na’in 806.
Jornalista: Hortencio Sanchez
Editór : Zezito Silva
