DILI, 06 outubru 2023 (TATOLI)—Prezidente Institutu Nasionál Defeza Direitu Labarik (INDDICA, sigla portugés), Dinorah Granadeiro, hateten haruka labarik Oé-Cusse halo negósiu iha Dili fila ba RAEOA ne’e, liuhosi avaliasaun mak INDDICA ho RAEOA kria kondisaun reál hafoin bele deside.
Notísia Relevante: INDDICA koordena ho APORTIL kontrola labarik Oé-Cusse halo viajen mai Dili
“Avaliasaun foun mak parte rua presiza hatene labarik no família nia situasaun no kondisaun realidade mak ida oinsá. Atu nune’e, ita trasa planu karik responde kedas ho labarik nia situasaun moris realidade iha família nian. Agora, ita la halo avaliasaun mak trasa de’it planu mak sei la responde ema-nia kondisaun moris loron-loron nian ho família. Ida-ne’e labele, tanba sei implika ba sira-nia moris no oinsá mak sira bele goza sira-nia direitu,” Dinorah hateten ba Agência Tatoli iha Manleuana.
Husu bainhira mak halo avaliasaun ba labarik Oé-Cusse faan sasán iha dalan ninin, nia hateten, daudaun ne’e INDDICA prepara hela tékniku no halo hela komunikasaun ho ekipa RAEOA atu oinsá halo avlaisaun.
“Ita indika ona pontu fokál INDDICA ho RAEOA nian komesa halo servisu tékniku balun no ami sei hahú ho RAEOA nian, tanba labarik hosi ne’ebá mak barak liu. Servisu ida-ne’e hanesan pilotu ida hodi bele hatene nia susesu iha ne’ebé no karik failansu iha ita bele hadi’a no mós rekursu, tanba bainhira ezekuta dala ida iha munisípiu hotu-hotu mak ita hanesan fó mehi ne’ebé boot maibé ita rasik labele ezekuta,” nia esplika.
Tanba ne’e, avaliasaun ne’e sei hahú hosi RAEOA mak sei kontinua kedas ba munisípiu seluk, tanba bainhira haruka fila labarik ne’e la’ós buat fasil tanba sei presiza rekurus umanu, finansa, hodi kria kondisaun ne’ebé mak bele garante atu labarik labele fila-fali mai tan Dili.
Iha fulan hirak liuba, nia dehan, estabelese ona akordu entre INDDICA ho Prezidente RAEOA no presiza tau iha prátika, nune’e tempu badak halo ekipa konjunta entre parte rua hodi halo avaliasaun foun atu hatane kondisaun labarik nian, hafoin hahú trasa planu.
“Bainhira ita lori fila labarik sira-ne’e ba família iha Oé-Cusse, presiza iha preparasaun tékniku, finansa no ita mós tenke prepara kondisaun família nian, Nune’e, aban bainrua fila karik sira-nia moris labele aat liu fali moris atuál ne’e,” nia dehan.
Notísia Relevante: INDDICA preokupa labarik barak hosi Oé-Cusse fa’an sasán iha Dili
Jornalista : Osória Marques
Editór : Cancio Ximenes
