COVALIMA, 24 outubru 2023 (TATOLI) – Sekretariadu Tékniku Administrasaun Eleitorál (STAE) Covalima aluga viatura 30 hodi transporta materiál eleisaun suku ba postu administrativu sira.
“Viatura Estadu la sufisiente, nune’e ita aluga tan 30 atu transporta materiál eleisaun suku ba postu administrativu sira”, Diretór STAE Covalima, Francisco Gusmão, hatete ba Tatoli, iha nia servisu fatin Kampung Baru, ohin.
Razaun STAE aluga karreta tanba bazeia ba identifikasaun totál viatura Estadu iha Covalima 21 de’it. STAE Covalima aluga veíkulu ne’e ho verba $10.800, kada viatura aluga durante loron tolu ne’ebé selu $360.
Governu aloka $160.192,50 ne’ebé hafahe ba rúbrika sira hanesan ba formasaun profisionál $7.940, instalasaun $5.340, arrendementu proprietáriu $2.500, aluga karreta $10.800,00, despeza operasionál $36.222,50, servisu profisionál $87.600 no servisu seluk $9.790.
Totál eleitór husi munisípiu Covalima ne’ebé mai husi postu administrativu Fatululik, Fatumea, Fohorem, Tilomar, Maucatar, Zumalai no Suai hamutuk 49.469, kompostu husi mane – 25.220 no feto 2.4216.
STAE mós rejista eleitór mate iha Covalima hamutuk nain-353, kompostu husi mane na’in-186 no feto 167.
STAE Covalima kria sentru votasaun 148 atu hala’o eleisaun suku iha loron 28 outubru ne’e.
Antes atu transporta materiál eleisaun, tékniku STAE Covalima halo empakotamentu ba materiál eleisaun hafoin simu husi nasionál, horisehik.
Diretór STAE Covalima, Francisco Gusmão, hatete eleisaun suku iha Covalina hetan livru boletin suku hamutuk 1.103, aldeia 2.160 no delgada no delegadu 1.785.
Eleisaun suku ba tinan 2023 ho nia tipu buletin votu ba suku ho kór mutin, xefe aldeia kinur, delegadu no delegada matak no boletin kór verde reprezentante feto no kor de roza ba joven mane.
Komandante PNTL munisípiu Covalima, Superintendente Polísia Calisto Gonzaga, hatete preparasaun ba eleisaun suku ba ajente PNTL hetan apoia membru 40 husi nasionál atu koloka ba sentru votasaun sira.
Tuir dadus, ajente PNTL iha Covalima hamutuk 148 ne’ebe balun destaka bá iha eskuadra postu administrativu hitu.
Jornalista: Celestina Teles
Editora: Maria Auxiliadora
