DILI, 05 dezembru 2023 (TATOLI) – Bolseiru timoroan 29 sei kontinua sira-nian estudu iha Brazíl, iha ne’ebé na’in-16 selesionadu pur méritu hodi foti lisensiatura iha área medisina jerál no 13 bá kontinua mestradu no doutoramentu.
Bolseiru sira ne’e sei bá Brazíl hahú iha loron 09 dezembru no kada fulan sira sei hetan kustu ba moris ho montante $640 durante tempu ne’ebé determina katak linsensitura tinan haat ka lima, mestradu tinan rua no doutoramentu tinan haat. Osan ba benefisiáriu sira ne’e prevee ona iha orsamentu 2023 hamutuk millaun $9-resin.
Diretór-Ezekutivu Fundu Dezenvolvimentu Kapitál Umanu (FDCH), Júlio Aparício, hatete osan ne’ebé disponibiliza ba bolseiru na’in-29 ne’e atu uza ba sira-nian nesesidade kada loron no la konta ho sira-nian hela fatin inklui eskola.
“FDCH iha esperansa boot ba bolseiru na’in-29 katak bainhira filafali mai bele prepara aan atu kompete iha merkadu traballu no sai ema ida ne’ebé profisionál hodi kontinua dezenvolve nasaun ne’e ba futuru ida di’ak liu no bele sai dosente iha área espesifika sira atu ajuda liután prosesu ensinu ba estudante sira iha ensinu superiór ida ho kualidade”, nia afirma iha serimónia despedida ba bolseiru sira iha salaun City 8, Manleuana, ohin.
Júlio Aparício solisita ba benefisiáriu sira atu estuda tanba ne’e tenke fó atensaun ba tempu ne’ebé determina ona. Investimentu ne’ebé Governu halo ne’e tenke tau iha konsiderasaun katak prezensa bolseiru sira-nian iha Brazíl ne’e atu estuda la’ós atu halo tan buat seluk.
“Ha’u husu ba imi durante iha Brazíl tenke badinas estuda, hatudu dixiplina no responsabilidade, nune’e bele hakotu lalais imi-nian estudu tuir kontratu ne’ebé imi halo ona ho FDCH”, dehan.
Dirijente ne’e salienta katak bainhira bolseiru balun la finaliza estudu, FDCH sei prega sansaun ne’ebé todan atu devolve osan ne’ebé Governu hasai ona ba sira no bolseiru ne’e sei laiha tan oportunidade atu hetan apoiu hodi kontinua estudu iha rai-li’ur.
Nia informa mós katak, iha 2024, FDCH prevee millaun $16-resin atu apoia bolsa estudu ba timoroan sira. Osan sira ne’e Fundu aloka ba bolsa méritu, parsiál, veteranu inklui bolsa kompletu.
Iha sorin seluk, Ministru Planeamentu no Investimentu Estratéjiku, Gastão Sousa, husu ba bolseiru sira ne’ebé atu dezloka bá Brazíl iha tempu besik ne’e tenke iha kompromisu boot atu kompete iha batalla, signifika haka’as aan atu estuda hodi filafali mai bele sai ema ida importante iha nasaun ne’e.
Bolseiru Júlia Verdiál promete katak sei hakaas aan atu estuda no remata eskola tuir tempu ne’ebé determina ona, nune’e bele fila hodi kontribui ba dezenvolvimentu nasaun.
“Ha’u sei halo esforsu tanba mensajen ne’ebé ami-nian inan-aman no Governu husik mai ami ne’e todan, tan ne’e, ha’u sei estuda maka’as atu filafali tuir tempu ne’ebé ami halo ona akordu ho FDCH”, nia promete.
Embaixadór Brazil iha Timor-Leste, Maurício Madeiros de Assis, husu timoroan sira atu kuidadu aan no buka halo adaptasaun ho kultura Brazíl nian, nune’e labele tama iha risku ne’ebé la fó benefísiu ba sira.
“Tenke dixiplina no buka haka’as aan atu adapta ho kultura Brazíl nian no kuidadu aan tanba kultura rua ne’e la hanesan”, nia hameno.
Nia solisita mós ba bolseiru sira durante iha Brazíl di’ak liu foku de’it ba estuda atubele remata lalais hodi filafali mai Timor-Leste kontribui ba dezenvolvimentu nasaun.
“Imi tenke estuda maka’as kada loron minimál oras rua no aprende halo komunikasaun beibeik ho lian portugés loroloron, nune’e bele ajuda fasilita di’ak liután imi-nian estudu iha Brazíl”, sujere.
Notísia relevante: Timoroan rihun 10-resin benefisia ona Programa Bolsa Estudu husi FDCH
Jornalista: Tomé Amado
Editora: Maria Auxiliadora
