OÉ-CUSSE, 06 dezembru 2023 (TATOLI) – Departamentu Rejionál Transporte Terrestre (DRTT) hamutuk Komandu Polísia Nasionál Timor-Leste (PNTL) liuhosi sesaun tránzitu, kuarta ne’e sensibiliza utilizasaun sinál tránzitu iha estrada públiku ba motorista tum tum sira iha Oé-Cusse Ambeno.
“Komesa ohin ba oin, ita presiza kolabora, tanba besik loron boot sira-ne’e, ha’u husu motorista tum-tum sira, labele konsumu alkól depois la’o tuir estrada públiku, ida-ne’e labele akontese, tanba Natál no tinan foun ita hakarak kontente ho família la’ós mai kontente iha sela PNTL,” Diretór DRTT, Silvestre Sila Teme, ko’alia iha abertura hala’o iha komandu PNTL Oé-Cusse.
Tan ne’e sira-ne’ebé uza motorizada tum-tum tenke iha lisensa tránzitu kada fulan-neen, renova selu direita iha banku hodi kontribui ba kofre Estadu, presiza renova karta kondusaun, inspesaun, tanba bainhira mate, hetan pasa-revista sei kontribui selu-multa ho valór boot ba Estadu.
Notísia relevante: Trimestre datoluk 2023, DRTT kontribui reseita $33,496.00 ba kofre Estadu
Xefe Sesaun Tránzitu, Inspestór Polísia Yoseph Sani Coa, esplika, sensibilizasaun ne’e PNTL hala’o iha iha sub-rejiaun haat, Oésilo Pássabe no Nítibe, no pante Makasar fatin hira ona.
“Ohin espesialmente ba transporte tum-tum de’it, tanba agora maioria halo movimentu iha Oé-Cusse vila, atu prevene asidente tráfegu no estrada públiku, ita tanba besik ona ba loron boot natál no tinan foun, ami konvida ita-boot sira, hodi fahe informasaun kona-bá utilizasaun ba estrada públiku sira,” nia hateten.
Nia fó hanoin, bainhira atu sai motorista ida-ne’ebé di’ak, presiza revista uluk veíkulu ne’e atu utiliza, verifika kondisaun, dokumentu sira kompletu no válidu.
“Bainhira ita hala’o viajen, saida mak ita tenke halo hodi kumpri Dekretu-Lei númeru 06/2003, kona-bá kódigu estrada no diploma ministériál númeru 05/2010, kona-bá transporte públiku,” nia informa.
Notísia relevante:PNTL Oé-Cusse rekolla reseita rihun $14-resin
Jornalista: Abílio Elo Nini
Editór: Evaristo Soares Martins
