VIQUEQUE, 07 dezembru 2023 (TATOLI)—Uma hamutuk 96 iha suku Uma-Uain Kraik, postu Viqueque Vila, munisípiu Viqueque to’o agora seidauk asesu eletrisidade.
“Ami triste tebes tanba to’o agora ami seidauk asesu ba ahi eletrisidade. Depois Timor-Leste ukun rasik-an ami muda bá iha área Uetali iha tinan 2001 no to’o agora tinan 2023 laiha ahi eletrisidade. Enkuantu, ema iha suku seluk maioria asesu ona ahi eletrisidade,” Xefe suku Uma-Uain Kraik, Ângelo Miguel da Silva Soares, informa iha área Uetali, kinta ne’e.
Nia konsidera, eletrisidade sai hanesan nesesidade ba abitante sira iha tempu kalan no uza ba nesesidade sira seluk. Daudaun ne’e abitante Uetali kontinua depende ba kami, lilin no lamparina.
“Ha’u nu’udar autoridade lokál sente triste tanba ami-nia povu daudaun sei tuur iha nakukun laran. Povu presiza asesu ba naroman hotu atu estudante sira bele estuda ho di’ak iha tempu kalan,” nia akresenta.
Notísia relevante : Abitante aldeia Loco-Loco Uatulari tinan-20 nia laran la asesu eletrisidade
Área Uetali iha postu saúde ida, edifísiu eskola ida no kapela ida maibé laiha enerjia eletrisidade atu fornese ba edifísiu sira.
“Iha mandatu VII Governu, empreza balun mai instala ona ai-riin eletrisidade, maibé agora ita haree sai abandona. Nune’e, ha’u husu ba IX Governu atu kontinua filafali projetu eletrifikasaun ida-ne’e atu ami bele asesu,” nia hato’o.
Suku Uma-Uain Kraik iha populasaun hamutuk 300 resin hosi uma-kain 96, kompostu hosi aldeia haat hanesan Uakae, Loho, Halderai no Cailoi, inklui suku viziñu Bahalara-Uain ne’ebé hela iha Uetali.
Jornalista : Vitorino Lopes da Costa
Editora : Julia Chatarina
