BOBONARO,12 dezembru 2023 (TATOLI) – Ponte Samutaben ne’ebé iha suku Manapa, ligasaun hosi postu administrativu Cailaco ba postu Administrativu Maliana, munisípiu Bobonaro kotu totál kauza hosi hosi volume bee mota Bulobu.
Xefe suku Manapa, Zeferino Loco Bere, haktuir ponte ne’ebé kotu ho distánsia metru 13 hafoin akontese udan boot iha loron-segunda (11/12) ne’e.
Notísia relevante: MOP presiza aselera projetu estrada urbana Cailaco
“Akontesimentu ne’e maizumenus tuku 16:00 liu, ne’e mota ida naran Bulobu ne’e mak horisehik udan hosi foho lolon ne’e maka’as tebes maka bee tún nakonu rezulta ponte ida-ne’e tohar maizumenus metro 13,” nia ko’alia iha suku Manapa.
Nia dehan, ho akontesimentu ne’e provizoriumente movimentasaun transporte públiku no privada obrigatóriu tenke paradu, tanba laiha dalan alternativu seluk atu ultrapasa.
“Sira para hotu iha mota sorin, transfere hosi Maliana mai Cailaco, transporte hosi Cailaco simu simu hosi mota-ibun lori fali ba postu Cailaco no liu ba Ermera. Karik udan-boot mai movimentu tenke para, sé ita obriga-aan bele akontese dezastre ka bee bele lori ita, se ida-ne’e la rezolve tempu badak, movimentu sei para hotu no roda ekononia ba komunidade mós sei para totál,” nia hateten.
Aparício Manuél da Costa nu’udar motorista kamioneta, sente tauk-atu ultrapasa tanba dalan alternativu seluk laiha ona.
“Ami hosi Dili atu ba Turema-Goulolo hodi tula materiál una nian. Ha’u hanesan motorista sente ladún seguru, tanba ho situasaun klima hanesan ne’e ami labele halo buat ida, ami rekomenda ba governu atu rezolve situasaun ne’e,” nia dehan.
Nune’e mós, José da Purificação nu’udar abitante lokál suku Meligo, husu ba Ministériu Obra Públika atu halo intervensaun ho urjénsia atubele normaliza hika’as movimentasaun transporte públiku.
“Ami-nia viajen ba mai, tenke hakuur mota, hanesan horisehik, ami ba Maliana fila mai ponte kotu, ami liuhosi mota-laran, ami sente araska, liuliu alin estudante sira viajen hosi sorin, ami husu ba governu hadi’ak ona atubele viajen hosi Cailaco ba Maliana no mós ba Ermera,” nia fó hanoin ba Governu.
Tuir observasaun Jornalista Agência Tatoli iha terrenu nota katak, ponte ne’e tohar hosi diresaun postu Cailaco atu ba Maliana hodi difikulta transporte públiku no privada inklui ema la’o-ain liu-liu komunidade sira-ne’ebé lori produtu lokál atu asesu ba merkadu.
Enkuantu ponte ligasaun hosi munisípiu Bobonaro ba munisípiu Ermera ne’e konstrui dezde tempu okupasaun Indonézia.
Notísia relevante: Rai-rahun falun estrada Cailaco provoka komunidade sofre moras IRA
Jornalista: Sérgio da Cruz
Editór: Evaristo Soares Martins
