OÉ-CUSSE, 29 dezembru 2023 (TATOLI) – Funsionáriu orden públika sira, ne’ebé tutela iha Sekretáriu Rejionál ba Asuntu Administrasaun, Rejiaun Administrativa Espesiál Oé-Cusse Ambeno (RAEOA) husu ba Sekretáriu Estadu Asuntu Toponímia no Organizasaun Urbana (SEATOU), atu apoia transporte bele fasilita ba operasaun animal iha área urbana.
Notísia relevante:Autoridade RAEOA bandu ema labele husik animál iha área urbana
Francisco Suni, nu’udar funsionáriu orden públika, hato’o nia rekomendasaun ne’e, iha ámbitu sensibilizasaun dekretu-lei ijiene no orden públika, iha salaun administrasaun Numbei Oé-Cussse, kuarta ne’e.
“Durante ne’e ami simu orden hosi Sekretáriu Rejionál ba Asuntu Administrasaun, kona-bá operasaun animal iha área urbana, ida-ne’e ami ezekuta no iha rezultadu di’ak tanba kontribui reseita ba kofre Estadu no garante sidade moos no livre hosi animal,” Francisco Suni, ko’alia iha sesan husu no hatán.
“Maibé ami triste tanba transporte atu apoia ami-nia atividade operasaun maka ladúnn garantia, tanba durante ne’e ami uza de’it karreta ida, maibé kondisaun mós la estavél ona, tan ne’e liuhosi biban, pezensa Sekretáriu Estadu Asuntu Toponímia no Organizasaun Urbana husu sei bele apoia netik transporte,” nia husu.
Hatán ba asuntu ne’e, Sekretáriu Estadu Asuntu Toponímia no Organizasaun Urbana, Germano Santa Brites Dias, informa, sei orsamenta iha tinan oin.
“Maibé kona-bá transporte, ida-ne’e sei hato’o ba Diretór Jerál, atu aloka kedas nia orsamentu ba planu 2025 nian, tanba ita-nia liutiha ona, entaun iha OJE 2025 nune’e munisipíu sira bele hetan transporte, maibé ha’u husu, kontinua presta servisu ho kondisaun ne’ebé iha,” nia fó hanoin.
Notísia relevante:SEATOU sensibiliza dekretu-lei ijiene no orden públika iha Oé-Cusse
Durante ne’e Sekretáriu Rejionál Asuntu Agríkultura, servisu hamutuk ho Sekretáriu Rejionál ba Asuntu Administrasaun kria regulamentu hodi limite sirkulasaun animál sira iha área urbana liuliu iha suku (5); suku Nipani, Costa, Lifau, Cunha no Lalisuk pertense sub-rejiaun Pante Makasar.
Regulamentu ne’e Autoridade aplika dekretu lei tékniku pekuária nian ho númeru12/2014 kona-bá retrisaun movimentu tráfiku animál iha área urbana, bandu ema atu labele husik animál la’o livre iha sidade laran.
Notísia relevante: Autoridade RAEOA mantein polítika limita movimentu animál iha área urbana
Jornalista: Abílio Elo Nini
Editór: Evaristo Soares Martins
