DILI, 08 janeiru 2024 (TATOLI)–Jogadór favóritu AD SLB Laulara, Kay Olok Gusmão, lori ekipa marka tan vitória foun ida hodi sai nu’udar top scor provizóriu ho golu barak liu, hafoin halakon ekipa Klubu Craigieburn Pythons ho skor 11-1 iha kontinuasaun Taxa Timor Cup 2023, ne’ebé hala’o iha Melbourne-Austrália.
Jogu entre ekipa rua ne’e realiza iha domingu (07/01) lorokraik oras Austrália, ho klima udan-boot, maibé ekipa rua ida-idak tuun ho nia ritmu jogu ne’ebé iha.
AD SLB Laulara ne’ebé domina liu jogu iha minutu dahuluk halo jogu ida atrativu no domina bola husi ain ba ain ho pasajen ne’ebé iha ikus mai jogadór husi klube ne’ebé koñesidu ho Makikit Laulara, Kay Olok Gusmão, hatama uluk golu ida hodi muda skor provizóriu ba 1-0.
Nune’e jogu kontinua la’o ho ritmu disiplina, Adversáriu Craigieburn Pythons taka metin defeza, maibé Jogador Kay Olok, Revelino, Figo no Aday marka golu tutuir malu hodi muda skor 3-0.
Antes termina tempu, ekipa Adversáriu Craigieburn Pythons halo kontra ataka konsege hatama golu ida hodi muda skor 3-1. Ho golu ida-ne’e, ekipa rua mantein ho ritmu jogu ne’ebé iha to’o primeira parte termina, Kay Olok hatama tan golu hodi muda skor 4-1.
Notísia relevante : Timor-Leste Galaxy United halakon SLB Laulara 3-2 iha jogu Timor CUP
Tama ba segundu etapa, klubu rua kontinua hatudu idak-idak ninia ritmu jogu ho tátika no esforsu ne’ebé iha klubu AD SLB Laulara ho unidade aumenta tan golu hosi jogadór Figo Kevin, Aday, Eta no Kay Olok lori ekipa muda skor iha tabela no ukun provizoriu skor 11-1.
Nune’e, provizóriu iha jogu Timor CUP Kay hatama ona golu neen nu’udar top scor ho golu barak.
Ho vitória ih pontu iha tabele ne’ebé aas, Kapitaun AD SLB Laulara, Filomeno Junior da Costa hateten, ekipa AD SLB mak rekolla skor boot iha Grupu B nian prepara kompete iha semi finál to’o finál.
“Hosi jogu grupu B nian, AD SLB ohin rekolla tan pontu 11-1 hasoru klubu Craigieburn Pythons, tanba ita foin hetan vitória dala-rua no derreta dala ida hasoru ekipa Timor-Leste Galaxy United Melbourne manán AD SLB 3-2. Maibé agradese ho jogu di’ak ida ohin, ita hakat ba semi finál no ita sei halo preparasaun di’ak liután atu hasoru ekipa uma-nain no klubu sira seluk iha loron 10 janeiru 2023,” Filomeno haktuir liuhosi nota ne’ebé Agência Tatoli asesu, segunda ne’e.
Kapitaun Filomeno hato’o agradese, tanba durante jogu mezmu rai udan no malirin maka’as, maibé ekipa rua kontinua hatudu intensidade a’as jogu ho atrativu halo ema rihun ne’ebé asiste jogu sente animadu tebes.
Jogu Timor Cup ne’e asiste másimu hosi komunidade timor-oan sira iha Austrália inklui mós komunidade rai seluk ho klubu lubuk ida ne’ebé partisipa taxa Timor CUP 2023.
Jornalista : Antónia Gusmão
Editora : Julia Chatarina
