OÉ-CUSSE, 11 janeiru 2024 (TATOLI) – Ministériu Tranporte no Komunikasaun (MTK) liuhosi Diresaun Nasionál Transporte Terrestre (DNTT), kinta ne’e sensibiliza utilizasaun sinál tránzitu iha estrada públiku bá motorista sira iha Rejiaun Administrativa Espesiál Oé-Cusse Ambeno (RAEOA).
Tema hosi sensibilizasaun ne’e maka ‘mai ita hametin displina atu uza dalan públiku hodi prevene asidente’ hodi sensibiliza kona-bá sinál tránzitu kódigu estrada nian, liuliu artigu 75, labele konduz veíkulu ho kondisaun lanu ka uza ai-moruk (droga), no labele ko’alia telefone ka aparelu ruma bainhira konduz hela veíkulu no koñesimentu bá zebra-cross.
Nune’e mós ártigu 76, tenke uza asesoriu seguransa nian bainhira konduz veíkulu ruma, labele tula ema liu lotasaun hosi kapasidade veíkulu, no artigu 73 kona-bá proibidu ba veíkulu ne’ebé ho kondisaun kauza poluisaun rai, no artigu 74 kona-bá poluisaun lian.
Notísia relevante: DNTT rejista veíkulu importasaun hamutuk 86.823 iha tinan 2023
Diretora Nasionál DNTT, Maria Antónia Vitór, informa, atividade workshop ne’e, nu’udar programa anuál hosi MTK nian liuhosi DNTT, tanba iha 2023 DNTT hala’o ona iha munisipíu sira hanesan Covalima, Bobonaro, Ermera, Liquiçá, no iha 2024 hala’o iha RAEOA
“Alvu ne’e mai hosi ba xofér transporte públiku no privada sira hanesan tum-tum, angguna, mikrolete no estudante sira tanba workshop ne’e nia objetivu atu fahe informasaun ba sidadaun sira-ne’ebé lori motorizada no karreta, nune’e sira bele iha koñesimentu kle’an liután kona-bá regra tránzitu nian, oinsá seguru uza estrada públiku,” Maria Antónia Vitór, ko’alia otél Ambeno Oé-Cusse.
Tuir nia, asidente barak, ne’ebé akontese iha utilizasaun asesu rodaviariu nian, tuir loloos labele akontese.
Nune’e presiza komprimenta ba orden no sinál tránzitu, komprimenta ba asesu rodaviáriu ne’e importante, hosi asegura no evita asidente nesesáriu.
Tuir nia, konsikuénsia rua ba iha violasaun orden tránzitu nian, primeiru administrativu, Polísia impoin selu multa tanba indisiplinadu, segundu maka konsikuénsia fízika maka asidente, bele hetan bele kanek kmaan ba konsulta iha ospitál, bele lakon vida.
“Tan ne’e programa ne’e kontinuasaun kada tinan, ami konsidera katak liuhosi worshop hanesan ne’e importante atu fahe informasaun no sensibiliza esensialmente ba joven sira hodi prevene asidente nesesáriu sira, asegura utilizasaun transporte sira-ne’ebé ita utiliza bá,” nia katak.
Diretór Obra Públika, Candido dos Reis Amarál, reprezenta Autoridade RAEOA, agradese ba Governu Sentrál, tanba bele fahe informasaun kona-bá regra tránzitu nian ba transporte sira inklui entidade sira iha Oé-Cusse Ambeno.
“Ha’u reprezenta Autoridade RAEOA, ami hato’o agradese, tanba asuntu sira-ne’e, importante ba ita hotu, liuliu bá xofer sira, atubele hatene, oinsá utiliza estrada públiku tuir regra tránzitu nian, tanba agora transporte barak ona, la’ós hanesan uluk, agora aumenta tán ho tum-tum, ne’ebé presiza tebes atu hatene regra sira,” nia orgullu.
Notísia relevante: DNTT sensibiliza sinál tránzitu ba motorista sira
Jornalista: Abílio Elo Nini
Editór: Evaristo Soares Martins
