BAUCAU, 18 janeiru 2024 (TATOLI) – Infraestrura bázika, setór saúde no edukasaun sai ajenda prinsipál ba estrutura autoridade administrasaun munisipál Baucau liderada Veneranda Eurico Marques Lemos Martins durante mandatu.
Prezidente Autoridade Munisipál Baucau, Veneranda Eurico Marques Lemos Martins, esplika, durante serbí nu’udar lideransa iha Baucau sei kolabora ho entidade hotu hodi identifika dezafiu ne’ebé povu enfrenta iha kada bairru to’o rurál nune’e buka solusaun ne’ebé lais liuhosi intervensaun governu sentrál, lokál no parseiru dezenvolvimentu hotu.
“Durante ha’u-nia mandatu ha’u sei foku ba área importante sira-ne’ebé povu enfrenta iha sira-nia moris loron-loron,” Prezidente Autoridade Munisipál Baucau hateten iha Sentru Konvensaun Baucau (CCB, sigla Portugés), Vila Antiga, kinta ne’e.
Eis deputada Parlamentu Nasionál (PN) sei kontinua masimiza programa ne’ebé antes ne’e realiza ona no asegura fornesementu bee-moos ba komunidade sira ho distánsia besik tuir kondisaun Baucau ne’ebé bee matan barak.
Estrutura autoridade munisipál foun liuhosi pose halo ona juramentu atu serbí ba povu, governu no estadu nune’e fó prioridade ba setór saúde no edukasaun liuliu infraestrutura bázika.
Setór saúde sei foku ba establesementu infraestrutura to’o baze hahú hosi ospitál rejionál, sentru no postu saúde sira tenke prienxe padraun mínimu, liuliu estoke ai-moruk tenke sufsiente, ambulánsia ba transporta pasiente no hasa’e nutrisaun ba labarik sira.
Enkuantu setór edukasaun foka ba fasilita asesu oan sira ba eskola, hadi’a kualidade edukasaun tantu públiku no privadu nune’e iha prestasaun di’ak hodi hamorin Baucau nian iha nível nasionál.
“Hau sei tau matan mos ba infraestrutura bázika hanesan asesu ba estrada, eletrisidade no rede telekomunikasaun.
Venderanda Lemos, sei serbisu hamutuk hamutuk ho xefe suku sira atu identifika falta infraestrutura bázika nune’e hato’o ba governu sentrál liuliu instituisaun relevante sira hodi responde ho urjénsia ba asuntu hirak-ne’e.
Eis membru governu ne’e konsidera munisípiu Baucau poténsia nune’e sei serbisu hamutuk ho CCI-TL Baucau, setór privadu lokál, nasionál no internasionál hodi dezenvolve setór agrikultura, turismu, pekuária hodi kontribui ba implementasaun programa merenda eskolár.
Setór turismu mós sai atensaun iha autoridade munisipál Baucau hanesan kria kondisaun hodi dezenvolve no promove sítiu turístika, relijiozu no istóriku ne’ebé sai símbolu ba Baucau.
“Ha’u moos iha mehi ida atu halo Baucau sai sidade ne’ebé moos liu iha Timor-Leste tomak,” Veneranda Lemos promete.
Eis Sekretáriu Administrasaun Munisipál Baucau, Simão Pinheiro, informa, nu’udar funsionáriu publiku sai ajente ba estadu sempre koopera no prontu kolabora ho estrutura administrasaun munisipál foun hodi dezenvolve Baucau.
“Ha’u iha esperansa di’ak tanba maihosi Baucau oan rasik, feto potensiál. Ha’u fiar sei halo buat di’ak ba rai-ne’e,” Simão Pinheiro akresenta.
Notísia relevante: Veneranda Lemos ofisialmente lidera Baucau
Jornalista : Natalino Belo
Editór : Evaristo Soares Martins
