BOBONARO, 23 janeiru 2024 (TATOLI) – Programa Nasionál Dezenvolvimentu Suku (PNDS), tersa ne’e halo sensibilizasaun kona-bá implementasaun projetu tinan 2024 ba autoridade lokál no ekipa jestaun suku sira iha munisípiu Bobonaro.
Reprezentante Sekretáriu Ezekutivu PNDS, Marito Pinto, esplika sensibilizasaun ne’e hanesan atividade regulár PNDS nia ne’ebé realiza kada tinan ho objetivu atu transmite informasaun detalla molok tama iha faze implementasaun projetu no ezekusaun orsamentu.
Nia dehan, atividade ne’e nu’udar faze dahuluk molok tama iha implementasaun, hodi fahe informasaun ba xefe suku sira no ekipa jestaun suku.
“Bele iha informasaun klaru ba implementasaun nia lala’ok ne’e oinsá, atubele fasilita di’ak liután xefe suku no ekipa jestaun suku sira atu nune’e implementa ita-nia atividade hirak-ne’e tuir duni matadalan no lala’ok ne’ebé iha hodi garante ninia kualidade,” nia ko’alia iha salaun enkontru administrasaun postu administrativu Maliana.
Nia husu ba autoridade lokál sira atu intende didi’ak matalan programa PNDS nian, nune’e ba futuru implementa projetu iha terrenu labele hasoru fallansu.
Prezidente Autoridade Munisípiu Bobonaro, Ernesto de Oliveira Barreto, husu xefe suku sira foin eleitu atu partisispa atividade ne’e to’o nia rohan, nune’e bainhira implementa atvidade iha suku bele la’o ho susesu.
Nia konsidera xefe suku sira sai matan no tilun Governu Sentrál nian iha baze, kualkér atividade ne’ebé la’o iha suku uza orsamentu jerál estadu nian.
“Ita-boot sira iha direitu atu kontrola, tanba ne’e osan povu nian, labele hanesan uluk kompañia sira halo servisu konforme sira-nia hakarak, se ita la kontrola ita rasik mak lakon, tanba governu la tau matan ba munisípiu Bobonaro de’it,” nia fó hanoin.
Xefe suku Holsa, postu administrativu Maliana, António Santa Cruz, konsidera atividade ne’e hanesan doutrina ida atubele kompriende no la’o tuir matadalan ne’ebé hatuur ona iha PDNS.
“Ami durante ne’e sempre la’o tuir matadalan sira-ne’e, ha’u hanesan lideransa komunitária, observa implementasaun projetu PNDS iha suku, ami sente agradese tebes tanba PNDS nia programa ne’ebé halo iha suku, desizaun ne’e mai hosi komunidade. Ohin ami deside, ohin ne’e kedas mós ami bele halo kontratu, depois bele implementa tanba PNDS ne’e mai ho nia orsamentu pakote, ne’ebé desizaun ne’ebé mai hosi suku mai to’o munisípiu sei la muda nia item ida tuir de’it tékniku sira-nia hakarak,” nia subliña.
Enkuantu atvidade sensibilizasaun ne’e realiza iha munisípiu 13 inklui Rejiaun Administrativa Espesiál Oecuse Ambeno (RAEOA)
Notísia relavante: KFP nomeia Rosário Mali lidera PNDS Bobonaro
Jornalista: Sérgio da Cruz
Editór: Evaristo Soares Martins
