DILI, 09 fevereiru 2024 (TATOLI) – Pasiente Hospital Nacional Guido Valadares (HNGV), simu prezente liuhusi asaun karitativa husi Kompañia China Civil Engineering Construction Corporation (CCECC), iha ámbitu komemorasaun tinan foun Xina nian.
Jerente negósiu CCECC, Cui Zhenggou, hateten, atividade ida ne’e hanesan hatudu domin ba ema moras sira iha sala internamentu HNGV, relasiona ho tinan foun xineza ne’ebé selebra iha loron 9 fevereiu 2024.
“CCECC la’ós halo konstrusaun de’it ba HNGV pediatria andar lima maibé iha biban ne’e mós ami hakarak hatudu domin ba sosiadade liuhusi prezente ne’ebé simples ba moras sira tanba relasiona ho tinan foun xineza nian nune’e ami hakarak fahe domin no mellór komprimentu hamutuk ho sosiedade no moras sira,” Cui Zhenggou hateten, iha entrevista, tuir komunikadu HNGV ba TATOLI, iha salaun enkontru CCECC, Bidau Dili, kinta ne’e.
CCECC hato’o mós agradesimentu ba Ministra Saúde ho nia membru estrutura tomak no mós HNGV ba apoiu no kolaborasaun servisu durante ne’e la’o ho di’ak.
“Obrigadu barak Ministériu saúde no HNGV tanba ho servisu hamutuk no apoiu servisu hotu la’o ho di’ak, uainhira ami mesak labele halo buat ida. Espera antes kontratadu ramata ami se halo buat di’ak ruma ba pasiente sira liuhusi prezente ne’ebé ami oferese tuir ami-nia kbiit no responsabilidade,” Jerente negósiu ne’e CCECC.
Iha parte seluk, Diretora enfermajen & parteira HNGV, Maximiniana L.S. Ferrão, lori konsellu diretiva HNGV hakarak agradese Kompañia CCECC ne’ebé atuál halo hela kontrusaun ba sala pediatria andar lima lokaliza iha HNGV.
Diretora ne’e hateten, Kompañia CCECC iha inisitiva no vontade di’ak hodi oferese prezente ba moras sira iha sala enfermaria.
“Sira iha boa vontade ne’ebé diak no inisiativa rasik husi sira-nia fuan hakarak oferese prezente simples ba pasiente sira iha sala enfermaria pediatria, izolamento, pulmo non-TB no kuidadus paliativus,” ezekutiva ne’e reforsa.
Prezente ne’ebé HNGV simu husi kompañia CCECC, tuir nia, 100 pakotes ne’ebé apoiu bazika fó ba moras sira mak hanesan Sabaun, Eskova, Pastadente, Sanitizer, susu ben, Juice, Biskuit, no selseluk tan.
Marka prezensa iha atividade ida-ne’e mak Cui Zhenggou hanesan jestór negósiu CCECC, Chenliang hanesan xefi enjeñaria no jestór operasionál CCECC, Tomas Viegas hanesan Jestór administrasaun no tradutór CCECC, Vitor Soares Martins hanesan Diretór-jerál unidade jestaun projetu saúde, Maximiniana L.S. Ferrão hanesan Diretora enfermajen & parteira HNGV, Jacinto Ximenes Ornai hanesan Xefi departamentu enjeñaria HNGV, Armenia da C. Pereira hanesan Xefi gabinete kontrolu kualidade interina HNGV no ekipa kontrolu kualidade HNGV.
Entretantu, CCECC hanesan kompañia ida ne’ebé Governu Timor-Leste liuhusi Ministériu saúde fó konfiansa ba sira hodi harii konstrusaun andar lima ba pediatria HNGV to’o kontratu termina.
Notísia relevante:HNGV: Konstrusaun edifísiu pediatria no ICCU atinje ona 1.8%
Tatoli
