COVALIMA, 15 fevereiru 2024 (TATOLI) – Autoridade munisípiu Covalima hamutuk ho diretór servisu munisípal 18 no administradór postu sira aprezenta kalendáriu ba implementasaun planu asaun anuál (PAA) 2024, tanba tama ona fevereiru maibé seidauk implementa planu.
“Ohin, diretór munisipál sira aprezenta no diskute kalendáriu planu no ezekusaun orsamentu trimestre dahuluk, ne’ebé tama ona fulan-fevereiru la konsege ezekuta, maibé autoridade esforsu hamutuk ho asesór atubele atinje nia meta iha ezekusaun”, Sekretáriu Munisipál ba Administrasaun no Finansa, Alberto Moniz de Araújo, hatete ohin.
Nia dehan, daudaun autoridade seidauk implementa planu no programa ho nia orsamentu iha trimestre dahuluk, tanba iha razaun katak prezidente autoridade nomós diretora finansa munisipál seidauk rejista user name atu asesu ba asistema free balance hodi ezekuta orsamentu 2024.
Nune’e, diretora finansa munisipál iha ona Ministériu Finansa sentrál atu rejista user name, nune’e hahú implementa PAA tinan 2024 iha trimestre daruak to’o dahaat hodi bele atinji nia meta ezekusaun orsamentu ho nia programa 13, sub programa 31 nomós atividade 74.
Iha sorin seluk, Diretór Servisu Munisipál Saúde Covalima, Domingos Sequeira, reforsa katak iha aprezentasaun kaledáriu ne’e mos halo breafing ba diretór sira kona-ba implementasaun planu asaun, tanba maioria diretór sira foun no balun iha ona esperiénsia no balun seidauk, nune’e iha implementasaun programa ne’e bele la’o ho di’ak.
Orsamentu tinan 2024 ba Covalima hamutuk millaun $7,3 ne’ebé aloka ba saláriu no vensimentu $2,3, bens no servisu $846.885, tranferénsia públika millaun $2,6, kapitál menór $166.820, no kapitál dezenvolvimentu millaun $1,4.
Orsamentu apoiu ba administrasaun munisípiu Covalima ho postu administrativu hitu hamutuk $3,05. Husi orsamentu ne’e aloka baservisu Mmunisipál $ 2,5 no ba postu administrativu $601.706.
Notísia relevante: Autoridade Covalima entrega envelope fiskál 2024 ba diresaun sira ho montante millaun $7,3
Jornalista: Celestina Teles
Editora: Maria Auxiliadora
