COVALIMA, 12 fevereiru 2024 (TATOLI) – Autoridade Munisípiu Covalima liuhusi enkontru koordenasaun munisipál, entrega iha segunda ne’e, envelope fiskál 2024 ba diresaun 10 no postu administrativu sira mak hanesan Fatululik, Fatumea, Fohorem, Tilomar, Maucatar, Suai no Zumalai.
Orsamentu ne’ebé Autoridade Covalima hetan husi Governu sentrál hamutuk $7,256.651 ne’ebé aloka ba saláriu no vensimentu $2,336.743, bens no servisu $846.885, tranferénsia públika $2,556.011, kapitál menór $166.820 no kapitál dezenvolvimentu $1.350.192.
Orsamentu tinan 2024 ba Autoridade Covalima ne’e atu finansia ba programa13 no sub-programa 31 ho atividade 74, tuir planu asaun anuál ne’ebé aprezenta husi kada Diresaun Servisu Munisipál sira.
Distribuisaun tetu orsamentu refere apoiu ba administrasaun munisípiu Covalima ho postu Administrativu hitu hamutuk $ 3,052.296, husi orsamentu ne’e aloka va servisu munisipál $2, 450.590 no ba postu administrativu $601.706
Verba ba Servisu Munisipál Saúde hamutuk $804.188, Edukasaun $ 1,843.785, Agrikultura $540.537, Obra Públika no Transporte $154.449, Água, Saneamentu Báziku no Ambiénte $203.564, Jestaun no Turizmu $210.874, Rejistu Notariadu $71,701, Prestasaun Sivíl no Jestaun Dezastre Naturál $156.402, Seguransa Alimentár $65.358 no Asaun Sosiál $1. 53.497
Administradór Munisípiu Covalima, Francisco de Andrade, husu diretór munisipál sira tenke ezekuta orsamentu ho responzabilidade no bainhira iha ezekusaun orsamentu hasoru difikuldade maka konsulta ho eis-diretór servisu munisipál.
Diretora Servisu Munisipál Finansa, Rosita Freitas, rekomenda ba diretór servisu munisipál sira ezekuta orsamentu tenke halo koordenasaun entre servisu munisipál no postu administrativu sira, submete pedidu orsamentu bazeia ba programa no planu asaun anuál no molok hetan aprovasaun ba proposta tenke iha verifikasuan uluk husi finansa hafoin submete ba gabinete administradór.
Aleinde ne’e, kada servisu munisipál no postu administrativu hitu tenke submete relatóriu trimesterál molok loron 15 no informa ba dministrasaun munisipál, servisu munisipál no postu administrativu sira katak iha 2024 labele iha dívida.
Rekorde katak, OJE 2023 ba Covalima hamutuk $5,738.515 ne’ebé fó prióridade ba programa 11 mak hanesan estrada no ponte aloka $67,709, dezenvolvimentu rurál no urbana $78.972, seguransa nasional $105.079, asesu ba justisa $54,368, boa governasaun no jestaun instituisionál $2,852.631 no agrikultura $528.958.
Água no saneamentu $165.441, saúde $244.959, edukasaun no formasaun $1,446.477, igualdade jeneru no onkluzaun sosial $136.300 no turizmu $ 57.621.
Jornalista: Celestina Teles
Editora: Maria Auxiliadora
