DILI, 20 fevereiru 2024 (TATOLI)—Grupu Organizadór Votasaun Estranjeiru (KPPSLN – Kelompok Penyelenggara Pemungutan Suara Luar Negeri) halo ona kontajen votu Eleisaun Prezidensiál Repúblika Indonézia (RI) tinan 2024, iha Timor-Leste, ne’ebé partisipa hosi sidadaun Indonézia hamutuk 3.418.
Portavóz Komisaun Eleisaun Estranjeiru (PPLN – Panitia Pemilihan Luar Negeri), Fidelis Ase Olin, hateten, kontajen votu ne’e hala’o iha loron 14 fevereiru 2024, iha Embaixada Repúblika Indonézia (KBRI) Dili, tuir oras Timor-Leste 15h00, ne’ebé simultáneamente ho kontajen iha Indonézia.
“Hosi rezultadu kontajen votu ba kandidatu Eleisaun Prezidensiál númeru 1, Anies Baswedan ho nia Vise Muhaimin Iskandar hetan votu hamutuk 307, kandidatu númeru 2, Prabowo Subianto ho nia Vise Gibran Rakabuming Raka hetan votu 2.106 no kandidatu númeru 3, Ganjar Pranowo ho nia Vise Mahfud MD hetan 987, enkuantu votu inválidu hamutuk 18,” Fidelis Ase Olin, relata liuhosi nota ne’ebé Agência Tatoli asesu, tersa ne’e.
Eleisaun realiza simultánea iha Indonézia iha loron 14 fevereiru 2024, enkuantu iha Timor-Leste realiza ona iha loron 11 fevereiru.
Nune’e, iha reuniaun plenária rekapitulasaun ba kontajen votu hala’o iha loron 17 fevereiru 2024 iha KBRI Dili, fo sai katak sidadaun Indonézia hamutuk 3.418 partisipa eleisaun.
Notísia relevante : Eleisaun prezidensiál 2024: Sidadaun Indonézia iha TL ohin halo eleisaun
Enkuantu rezultadu votu eleisaun ba membru lejislativu (DPR RI) ne’e Partai Kebangkit Bangsa, (PKB) hetan votu hamutuk 144, Partidu Golkar 356, Partidu Nasdem 61, Patridu Buruh 21, Partidu Gelora 17, Partai Keadilan Sejahtera (PKS) 165, no Partai Kebangkitan Nusantara (PKN) hetan votu hitu.
Nune’e, Partidu Hanura votu 19, Partidu Garuda neen, Partai Amanat Nasional (PAN) 131, Partai Bulan Bintang (PBB) tolu Partai Demokrat 153, Partai Solidaritas Indonesia (PSI) 437, Partidu Perindo 70, Partai Persatuan Pembangunan (PPP) 43, Partidu Ummat ualu, votu inválidu 140.
“Lori Panitia Pemilihan Luar Negeri nia naran no parte hotu ne’ebé serbisu ba iha eleisaun jerál Prezidensiál 2024 iha Timor-Leste, ha’u hato’o obrigada, agradese uain ba ita hotu nia kolaborasaun durante Eleisaun Jerál Prezidensiál RI 2024 la’o di’ak,” nia akresenta.
Biban ne’e, nia agradese parte Polísia Nasionál Timor-Leste, (PNTL) ne’ebé akompaña eleisaun hahú hosi munisípiu to’o mai Dili inklui membru Polísia hosi Nusa Tenggara Timur (NTT) ne’ebé destaka mai iha KBRI Dili hodi akompaña eleisaun to’o ramata.
Aleinde ne’e, agradese mós ba Ministériu Saúde ne’ebé destaka ekipa pesoál emerjénsia saúde nian iha KBRI durante eleisaun la’o.
Númeru totál eleitór rejistu iha lista eleitór permanente no estranjeiru (DPTLN – Daftar Pemilih Tetap Luar negeri) iha PPLN Dili hamutuk 5.833 ba bulletin votu ne’ebé prepara hamutuk 5.958.
Bazeia ba pájina ofisiál Komisaun Jerál Eleisaun (KPU – Komisi Pemilihan Umum), hatudu katak progresu kontajen votu to’o iha segunda (19/02/2024) 09:15 otl konsege rejistu andamentu buletin votu ne’ebé tama hamutuk 580.097, hosi 823.236 fatin votasaun (TPS – Tempat Pemungutan Suara) ho 70,47%.
Hosi rezultadu ne’e, daudaun Kandidatu númeru 2, Prabowo Subianto ho nia Vise Gibran Rakabuming Raka mak hetan votu maioria hamutuk 54.505.337, reprezenta 58,31% hosi totál votu.
Tuir fali kandidatu númeru 1, Anies Baswedan ho nia Vise Muhaimin Iskandar hetan votu 22.763.405, reprezenta 24,35% no ikus mak kandidatu númeru 3, Ganjar Pranowo ho nia Vise Mahfud Md hetan votu 16.213.499, reprezenta 17,34%.
Antes ne’e, KPU rejista ema 204.807.222 partisipa iha Eleisaun Jerál RI 2024, kompostu hosi iha rai-laran 203.056.748 (postu administrativu 514) no rai-li’ur 1.750.474 (nasaun 128).
Jornalista : Arminda Fonseca
Editora : Julia Chatarina
