DILI, 22 fevereiru 2024 (TATOLI)—Jerente sira iha Institutu Nasionál Seguransa Sosiál (INSS) daudaun ne’e hamutuk ho Banku Nasionál Komérsiu Timor-Leste (BNCTL, sigla portugés) koopera no halo diskusaun ba mudansa kalendáriu pagamentu ba idozu no invalidez.
Programa ne’e bazeia ba dekretu-lei 19/2008 19 juñu kona-ba kriasaun subsídiu apoiu ba idozu no invalidez, katak pagamentu realiza dala-rua kada tinan.
“Hafoin ami hetan mandatu hosi IX Governu, ami hanoin atu koko muda kalendáriu pagamentu, agora koordena ona ho BNCTL, ita iha alternativu rua halo diskusaun mak ba benefisiáriu sira ne’ebé iha ona konta bankária no ATM rasik sira kada fulan bele foti sira-nia direitu no hirak ne’ebé seidauk iha durante ne’e uza de’it kartaun pagamentu, ita bele halo pagamentu iha suku área rurál kada fulan-tolu ka haat durante tinan-ida nia laran,” Prezidente INSS, Arlindo Pinto, informa ba Agência Tatoli, iha ninia knaar fatin, Caicoli, kinta ne’e.
Daudaun INSS halo hela esforsu no kontinua halo diskusaun ho lBNCTL, nune’e semana rua mai tan sei halo nota entedimentu ida atu kria ekipa hodi halo ezersisíu pagamentu ba benefisiáriu sira.
“Atu hatene rezultadu ne’e, hafoin ita halo nota entedimentu maibé planu sedu liu atu implementa iha tinan ne’e,” nia akresenta.
Notísia relevante : Deputada PD sujere MSSI hadi’a mekanizmu pagamentu ba idózu sira
Aleinde ne’e, institutu fó ona dadus benefisiáriu globál ba programa pensaun sosiál hamutuk 120.000 ba BNCTL hodi sira halo verifikasaun kuantidade benefisiáriu ne’ebé mak uza ona konta bankária inklui ATM no seidauk uza.
“Benefisiáriu idozu no invalidez ne’ebé sei hetan pagamentu iha tinan ne’e hamutuk 120.000 ho nia orsamentu hamutuk $86.023.178,” Prezidente institutu relata.
Iha parte seluk, Konsellu Ministru aprova ona alterasaun dahuluk dekretu-lei númeru 53/2022 20 jullu, ne’ebé aprova rejime jurídiku pensaun sosiál invalidez no velhice iha ámbitu rejime naun kontributivu seguransa sosiál, mensiona mós katak subsídiu fahe tuir kategoria idade, ne’ebé kategoria dahuluk hosi idade 60-69 sei hetan $60, kategoria daruak idade 70-80 hetan $80 no kategoria datokuk ho idade 80 ba leten sei simu $100.
“Hosi montante osan ne’ebé iha, ita-nia idozu ne’ebé sei simu pagamentu tuir idade iha tinan ne’e mak hanesan benefisiáriu ho idade hosi 60-69 hamutuk 42.177, idade 70-79 hamutuk 47.703, no idade 80 ba leten hamutuk 20.120,” nia informa.
Ba pensaun sosiál invalidéz, hahú bolu eskalaun únika ho idade 18-59 hamutuk 10.000 ho nia orsamentu hamutuk $7.200.000, ne’ebé kada fulan simu $60.
Bazeia hosi dadus provizóriu, iha idozu hamutuk 200 resin maka lakon ona vida iha tinan kotuk, nune’e tinan ne’e BNCTL kansela pagamentu pensaun sosiál.
Jornalista : Arminda Fonseca
Editora : Julia Chatarina
