OÉ-CUSSE, 05 marsu 2024 (TATOLI) – Xefe suku Bobometo sub-rejiaun Oésilo, José Labi Caet, husu Autoridade Rejiaun Administrativa Espesiál Oé-Cusse Ambeno (RAEOA), atu harii ponte no kapela bodi fasilita movimentasaun bá semitériu masakre Bobo-Ufe Tumin.
Notísia relevante: Masakre Tumin: Milísia oho ema na’in-14 iha 08 setembru 1999 (I)
Líder komunitária suku Bobometo, hato’o nia pedidu ne’e iha ámbitu Prezidente Autoridade Rogério Tiago Lobato, hamutuk ho Koordenadór ZEEDOA, João Mendes Conçalves, presta omajen iha semitériu masakre Bobo-Ufe Tumin, tersa ne’e.
Razaun propoin harii ponte tanba área refere iha mota ida.
“Ha’u pédidu kona-bá sasán ne’ebé presiza iha masakre ne’e, liuliu kada tinan atu selebra nia loron akontesimentu iha 8-9 setembru 1999, falta igereja atu realiza misa iha-ne’e, depois bainhira atu hakat tama mai iha semitériu masakre ne’e, iha ponte ki’ik ida iha-ne’ebá maibé aat, tán ne’e ha’u husu Prezidente Autoridade atu tau atensaun nune’e bele tama mai ho di’ak,” José Labi Caet, ko’alia iha ámbitu ne’e.
Autoridade lokál ne’e, informa, akontesimentu masakre Bobo-Ufe, rezulta ema na’in-82 lakon sira-nia vida iha loron 8-9 setembru 1999, no daudaun ne’e na’in-12 seidauk hetan rekoñesimentu pensaun hosi Estadu.
“Sira mate ne’e hamutuk na’in-82, maibé hela na’in-12 maka seidauk hetan pensaun hosi Governu, ne’e maka ha’u sujere ba ministériu kombatente atubele tau konsiderasaun,” nia katak.
Notísia relevante: Masakre Tumin: “Subar kalan haat, ha’u-nia kanek ne’e ular hotu”
Hatán ba rekomendasaun ne’e, Prezidente Autoridade Rogério Tiago Lobato, promete sei fó apoia maibé presiza pedidu ofisiál liuhosi karta nune’e bele responde, tan ne’e hanesan obrigasaun atu valoriza.
“Ein-prinsipíu ha’u prontu atu suporta hanesan Prezidente Autoridade, tanba ne’e obrigasaun, sira mate ona, ita tenke halo buat ruma, kona-bá sira-ne’ebé seidauk hetan pensaun, presiza hato’o karta ida mai ha’u atubele ko’alia ho Primeiru Ministru no ministériu kombatente veteranu nian,” nia informa.
Tuir nia, nu’udar timoroan iha obrigasaun boot, tanba sakrifísiu ne’ebé haloiha 1999 valór bootliu tanba fakar raan hodi sosa ukun rasik-aan, tán ne’e autoridade RAEOA ka obrigasaun tenke harii kapela ida nu’udar fó onra ida.
“Iha karta ne’e, xefe suku favór esplika, saida mak imi hakarak, depois ha’u bele haruka ekipa tékniku sira hosi diresaun infraestrutura atu mai halo levantamentu iha-ne’e saida mak atu halo,” nia katak.
Notísia relevante: Sobrevivente masakre Tumin husu lídér nasionál liberta povu hosi kiak
Entretantu, semitériu masakre Bobo-Ufe Tumin, lokaliza iha aldeia Tumin, suku Bobometo, sub-rejiaun Oésilo.
Jornalista: Abílio Elo Nini
Editór: Evaristo Soares Martins
