VIQUEQUE, 11 abríl 2024 (TATOLI)-Xefe Sentru Saúde Viqueque Vila, Celestina Soares, informa, Sentru Saúde Viqueque Vila halo ona kolokasaun ba pesoal saúde na’in-18 iha kada postu saúde hodi reforsa atendementu ba abitante sira iha postu Viqueque Vila, munisípiu Viqueque.
“Hafoin pesoál saúde sira nia kontratu hotu iha 31 Dezembru 2023. Entaun ami menus tiha pesoál saúde, maibé foin lalais Ministériu Saúde halo rekrutamentu no haruka ba ami Sentru pesoal na’in-18. Nune’e ha’u halo kedas kolokasaun ba postu saúde sira-ne’ebé menus pesoál saúde iha kada postu saúde sira”, Celestina Soares, hateten ba Agência TATOLI, iha ninia kna’ar fatin, ohin.
Pesoál saúde ne’ebé koloka ba Sentru Saúde Viqueque hamutuk na’in-18 ne’e kompostu husi parteira haat, enfermeiru hitu, saúde públiku tolu, farmasia na’in-tolu no médiku ida.
Husi númeru ne’e sentru saúde Viqueque Vila koloka ba postu saúde no sentru rasik maka hanesan postu saúde Beobe koloka enfermeiru ida, postu saúde Kararas enfermeiru ida, postu saúde Builarik parteira ida, postu saúde Uetali enfermeiru ida no parteira ida, postu saúde Bibileo parteira ida, postu saúde Wetodo parteira ida, postu saúde SP2 suku Luca enfermeiru ida, Ratahu mediku ida no enfermeira ida, postu saúde Beaço parteira ida no enfermeira ida.
Pesoal saúde públiku na’in tolu maka koloka iha sentru saúde Viqueque Vila hodi haree administrasaun no tau matan ba programa promosaun saúde.
“Ho pesoal saúde hirak, ami sente sufisiente ona atu halo atendementu ba pasiente. Maibé atu priense kritériu ne’e ita seidauk priense tanba postu saúde balun sei menus médiku”, nia afirma.
Ho situasaun ne’e, nia relata fó aprezenta ona mapamentu ba Ministériu Saúde hodi haree no halo rekrutamentu.
“Sentru saúde Viqueque Vila ami iha postu saúde hamutuk 12, maibé iha médiku na’in lima ne’ebé koloka iha postu Saúde Lugasa, postu saúde Beobe, postu saúde Ratahu, postu saúde SP2 Luca no postu saúde Uaimori. Lolos ne’e kada postu saúde ida iha médiku ida”, katak.
Tuir demografia postu Viqueque Vila iha suku 10 ho aldeia 62 ho nia totál populasaun hamutuk 31.112 ho totál postu saúde 12 ho nia pesoál saúde hamutuk 30.
Notísia relevante:Pesoál saúde kontratadu 35 kontinua servisu voluntária iha sentru saúde Viqueque Vila
Jornalista:Vitorino Lopes da Costa
Editór : Florencio Miranda Ximenes
