DILI, 17 abríl 2024 (TATOLI)–Sekretaria Estadu Asuntu Toponímia Organizasaun Urbana (SEATOU) serbisu hamutuk ho Autoridade munisípiu Dili sei fó notifikasaun ba komunidade ne’ebé okupa iha área protejida lagoa Tasi-tolu.
“Komunidade ne’ebé kontinua hela iha área protejida Tasi-tolu nian, orsida lorokraik ami sei prezensa iha ne’ebá hodi simu serbisu hodi haree maluk sira ne’ebé okupa iha foho lolon no lagoa ita sei ko’alia ho sira no notifika sira hodi husik fatin refere, tanba ne’ebá hanesan fatin turizmu la’ós ba hela estraga fali ambiente no ke’e rai iha foho lolon sira hela fali,” Sekretáriu Estadu Asuntu Toponímia Organizasaun Urbana, Germano Santa Brites Dias, hateten, iha Aitarak-laran, kuarta ne’e.
Aleinde ne’e, Sekretáriu Estadu husu ba komunidade atu para ona halo uma no ke’e rai iha foho loloon iha área Balide, Fatuahi tun na Berraka no Hera nian.
“Sekretáriu Estadu Asuntu Toponímia Organizasaun Urbana ho ekipa daudaun kontinua nafatin halo serbisu, liu-liu iha parte Dili, haree ba notifikasaun ne’ebé fó ona ba komunidade maibé la halo tuir to’o notifikasaun ne’e mate ita sei haree uluk ida-ne’e hodi muda sai mak kontinua haree sira seluk,” nia akresenta.
Notísia relevante : SEATOU hakarak transforma sidade iha territóriu sai moos no organizadu
Maibé nafatin apela ba públiku katak ekipa konjunta kontinua halo serbisu, nune’e husu ba okupante sira ne’ebé daudaun okupa espasu públiku ka rai Estadu halo konstrusaun maibé laiha karta ruma hosi Terra no Propriedade, iha tempu badak ekipa sei identifika no notifika atu hamamuk fatin.
Ekipa ne’ebé lidera husi SEATOU halo serbisu bazeia ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.
Jornalista : Arminda Fonseca
Editora : Julia Chatarina
