DILI, 24 maiu 2024 (TATOLI)-Deputadu membru Komisaun B ne’ebé trata asuntu Negósiu Estranjeiru, Defeza ho Seguransa iha Parlamentu Nasionál, Natalino dos Santos, husu ba Polisia Nasionál Timor-Leste (PNTL) atu investiga membru grupu organizadu ka suspeitu ne’ebé hadau sidadaun sira-nia telefone no foti-subar sásan sira seluk iha kapitál Dili.
Notísia Relevante: Ekipa asegura tán suspeitu na’in-lima hadau telefone
“Ha’u hakarak husu ba PNTL, tanba sidadaun barak sente la seguru bainhira halo movimentu iha loron no kalan, tanba na’ ok-teen barak tebes. Ita triste rona dehan, iha ema na’ok-teen sira na’ok señora ida-nia telefóne, nune’e señora ne’e ho nia oan duni tuir to’o hetan dezastre, ne’ebé rezultadu nia oan mate no inan mós mate,” nia hateten ba jornalista sira iha resintu Parlamentu Nasionál.
Tanba ne’e, Deputadu husi membru komisaun B ne’e husu PNTL atu halo vijilánsia no tau atensaun ba fatin sira-ne’ebé identifika risku ba na’ok-teen sira atu hadau telefóne ne’e, tenke kontrola másimu hodi halo patrulla.
Nia husu atu fó sansaun ba autór sira no mós atu halo investigasaun, tanba haree situasaun ne’e krime organizadu iha fati-fatin halo ne’ebé halo populasaun pániku no la seguru.
PNTL iha dever atu halo patrollamentu durante oras 24 no husu autoridade lokál sira atu serbisu hamutuk ho Ofisiál Polísia Suku (OPS), hodi nune’e karik identifika nia komunidade balun mak komete aktu hanesan ne’e bele hato’o kedas ba autoridade seguransa atu bele halo identifikasaun.
Notísia Relevante: PNTL asegura suspeitu na’in-rua hadau telefone ne’ebé rezulta Nituchia Fangidae lakon vida
Jornalista : Nelson de Sousa
Editór : Cancio Ximenes
