OÉ-CUSSE, 27 maiu 2024 (TATOLI) – Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, fó- sai katak, Governu sentrál fó apoia ho konfiansa tomak ba Autoridade Rejiaun Administrativa Espesiál Oé-Cusse Ambeno (RAEOA), kona-bá polémika rezidénsia Fulolo.
“Prezidente RAEOA, hanesan ezekutivu tomak ne’e iha-ne’e, nia reprezenta Primeiru Ministru, entaun buat sira-ne’ebé akontese ne’e, ami husi Governu Sentrál fó apoia, no fó konfiansa maibé Autoridade tomak iha ne’e kolabora, entaun buat hotu ne’ebé iha RAEOA, ne’e nia jestaun administrasaun no nia autoridade nian,” Assanami ba Jornalista sira, hafoin enkontru ho Prezidente Autoridade RAEOA, Rogério Tiago Lobato, iha Oé-Cusse, segunda ohin.
Notísia relevante: Abitante afetadu 76 iha Costa hato’o pontu 12 ba Governu Sentrál no Autoridade RAEOA
Governante ne’e, hateten, problema rezidénsia Fulolo, tenke tetu ho kle’an, no haree asuntu ne’e ho klaru, maibé buat hotu iha nia dalan, justisa iha nia dalan rasik.
“Prinsipíu fundamentu mak ida-ne’e, povu mak na’in ba rai, no povu mak na’in ba votu no na’in ukun, nune’e, presiza ekilibriu justu ba povu hotu ba Estadu, entaun Estadu tenke foti sasán ho desizaun sira-ne’ebé di’ak,” nia hateten.
Tuir nia, dalaruma ohin ita seidauk haree katak, ne’e di’ak ba ohin loron, maibé dalaruma sei iha tempu naruk atu haree ladi’ak.
“Maibé buat hotu, ne’ebé akontese ne’e ida-idak iha nia dalan, Governu sentrál fó konfiánsa tomak ba iha Prezidente Autoridade ho nia komponente sei tau matan, iha PNTL iha justisa sira iha Oé-Cusse, ne’ebé sira iha ne’e mak sei halo,” nia konklui.
Notísia relevante: Alkatiri keixa: Prezidente Autoridade RAEOA Rogeiro Lobato hatán
Rekorda fali katak, iha loron 22 maiu foin lalais ne’e, Prezidente Autoridade RAEOA, Rogerio Tiago Lobato, hamutuk ho membru Autoridade no akompaña mós husi PNTL no serbisu terra propriedade, vizita ofisiál ba iha rezidénsia Fulolo, lokaliza iha aldeia Sanane, suku Costa, sub-rejiaun Pante Makasar.
Iha ámbitu vizita ofisiál ne’e, Rogério Tiago Lobato, promete sei anula tiha dokumentu akordu kona-bá kontratu kompra venda fa’an uma Estadu iha rezidénsia Fulolo, ne’ebé selebra husi Antigu Prezidente Autoridade Mari Alkatiri no Arsénio Paixão Bano, tanba konsidera akordu ne’e abuzu podér.
Tuir Rogériu Lobato, katak karta akordu kontratu promesa kompra e venda ne’e, autoridade sesante halo ona iha loron 23 outubru 2017, abaixu assinadu husi Arsénio Paixão Bano nu’udar Prezidente Autoridade em exersísiu nu’udar mós parte fa’an, ho kompradór mak Mari Bim Amude Alkatiri.
Jornalista: Abílio Elo Nini
Editór: Evaristo Soares Martins
