OÉ-CUSSE, 28 maiu 2024 (TATOLI) – Koordenadór Jerál ba Festivál Rabilau atuál Vise Primeiru-Ministru, Ministru Koordenadór Asuntu Sosiál, Dezenvolvimentu Rurál no Abitasaun Komunitária, Mariano Assanami Sabino, fó sai iha setembru 2024 ne’e Timor-Leste sei realiza festivál Rabilau ho objetivu atu promove valór kultura no turizmu ba mundu.
“Festivál Rabilau, ita sei tau iha tempu bailoron, sei akontese iha setembru tinan ne’e, festivál ida-ne’e importante atu hatudu promove Timor-Leste iha mundu, liu-liu ita-nia arte kultura, tradisaun, ita-nia lisan valór sira-ne’ebé ita iha, tan ne’e mak, iha atividade barak, atividade desportu, talentu, konferénsia, semináriu ba internasionál, no mós atividade oinsá mak promove Rabilau,” Mariano Assanami Sabino, ba jornalista sira iha Oé-Cusse, tersa ne’e.
Notísia relevante: SEAK realiza semináriu elaborasaun relatóriu periódika konvensaun UNESCO 2005
Governu Timor-Leste sei konvida bainaka sira husi nasaun viziñu no turista balun atu hola parte iha festivál ne’e.
Aliénde ne’e mós, sei konvida Premiadu Nobél da Pás sira, atu mai ko’alia kona-bá teknolojia, inklui mós atividade talentu sira seluk.
“Ita sei nakloke, sei partisipa husi nasaun viziñu sira, sei iha turista sira ita sei konvida para mai hola parte iha festival ne’e,” nia dehan.
Kona-bá orsamentu, sei finansia husi parseiru no Prezidente Repúblika ho montante millaun $1.5.
“Orsamentu ba festivál ne’e sei mai husi Prezidente Repúblika no mai mós husi ministériu sira atu haree, ita seidauk iha finaliza nia montante fiksu maibé sei husu para partisipasaun ministériu sira, tanba atividade lubun tenke integra ba iha ministériu sira,” nia informa.
Notísia relevante: SEAK-CNC konvida ema hotu partisipa iha eventu festivál kulturál
Entretantu, selebra festivál Rabilau lokaliza iha postu administrativu Maubise, munisipíu Ainaro no kalendáriu sei realiza iha loron 27 setembru 2024 ne’e.
Jornalista: Abílio Elo Nini
Editór: Evaristo Soares Martins
