BOBONARO, 29 maiu 2024 (TATOLI)-Iha implementasaun projetu Programa Nasionál Dezenvolvimentu Suku (PNDS) regulár tinan 2025 siklu da-neen ne’e, suku Saburai,postu administrativu Maliana, Munisípiu Bobonaro,hili prioridade halo reablitasaun ba eskola Ensinu Bazíku Filiál (EBF) Mabil-oa.
Xefe suku Saburai, Abel Manu Mali, informa projetu reabilitasaun ne’e tuir kalendáriu sei hahú iha finde juñu tinan 2024.
Notisia relevante: Dapur merenda eskolár iha EBF Mabil-Oa la seguru
“Programa PNDS iha siklu neen, suku Saburai implementa de’it ba halo reabilitasaun EBF Mabil-Oa,” Xefe suku Abel Manu Mali, informa ba Tatoli iha Maliana, kuarta ne’e.
Nia dehan, projetu ne’e sei foka liu ba aumenta saladeaula foun tolu, hodi kompleta sala neen, tanba sala atuál tolu ne’ebé iha labele akumula estudante husi primeiru to’o segundu siklu.
Nia afirma, líder komunitária sira destaka prioridade ne’e atu fasilita estudante ira-ne’ebé ho kondisaun defisiénsia fíziku asesu edukasaun besik, tanba estudante husi aldeia Kosál no Mabil-oan atu ba eskola iha aldeia Ai-Tasi tenke la’o ain loro-loron ho distánsia kuaze kilómetru haat.
“Ita haree distánsia ne’e mós sai fatór ida atu hamate labarik sira-nia vontade, liuliu defisiénsia fíziku sira ne’e, dalaruma sira eskola to’o terseiru anu de’it para ona la kontinua, tanba labele la’o husi Mabil-oa to’o Ai-Tasi. Ida-ne’e mak ha’u tau prioridade atu responde de’it alin oan sira-nia preukupasaun,” nia katak.
Iha tempu badak, nia parte sei tuur hamutuk ho intelektuál suku Saburai, Diretór Ensinu Báziku Centrál (EBC) no Koordenador eskola sira atu tau hanoin hamutuk hodi submete pedidu ida ba Ministériu Edukasaun atu loke klase paralelu terseiru siklu iha suku Saburai.
Nia dehan, presiza tebes lokál klase paralelu ne’e tanba estudante sira ne’ebé finaliza estudu segundu siklu iha EBF rua ne’ebé eziste iha Saburai, hakarak kontinua estudu terseiru siklu tenke ba to’o suku Tapo-Memo no Maliana.
Tuir dadus tinan 2022 estudante ne’ebé eskola iha EBF Mabil-oan hamutuk 100-resin no EBF ne’e konstrui iha tinan 2015 liuhosi projetu pakote referendu.
Notisia relevante: Enérjia elétrika iha Saburai mate kuaze semana ida ona
Jornalista: Sérgio da Cruz
Editór: Evaristo Soares Martins
