iklan

EKONOMIA, BOBONARO, HEADLINE, MUNISÍPIU

Enérjia elétrika iha Saburai mate kuaze semana ida ona

Enérjia elétrika iha Saburai mate kuaze semana ida ona

Enérjia elétrika ne'ebé empreza konstrutora instala iha suku Saburai, postu administrativu Maliana munisípiu Bobonaro. Imajen Tatoli/Sérgio da Cruz.

BOBONARO, 01 novembru 2023 (TATOLI) – Reprezentante joven feto suku Saburai, postu administrativu Maliana, munisípiu Bobonaro, Juvita de Jesus Moniz, sente kontente tanba iha fulan hirak liubá asesu enérjia elétrika, maibé naroman ne’e sira sente la kleur de’it, tanba ahi la funsiona (mate) kuaze semana ida ona to’o agora seidauk lakan.

Nia dehan, instalasaun ne’e hanesan promosaun de’it, tanba foin uza  no seidauk halo inaugurasaun ahi mate liu, nune’e nia konsidera naroman ne’e halo sira kontente loron sorin de’it.

Notísia Relevante:EDTL tenke kontrola beibeik projetu eletrifikasaun iha Saburai

“Ami foin tinan ida-ne’e mak haree iha naroman, maibé uza la kleur de’it, mate fila-fali, ami ladún satizfas, tanba uza hanesan promosaun de’it, depois nia aat liu, sira mai hadi’a semana ida ona, maibé seidauk lakan hela de’it até agora,” nia ko’alia iha sede suku Saburai, sesta ne’e.

Nia hatutan, instalasaun eletrsidade ne’e mús ladún iha kualidade di’ak, tanba durante ne’e komunidade sira uza enérjia laiha forsa.

“Iha aldeia Taz, bairru Aitasi, ne’e forsa, maibé iha Kosál ne’ebá forsa laiha loos, tanba sira uza cas telefoni de’it mós labele, lampu lakan forsa liha, ne’ebé rekomenda atu halo servisu karik tenke ho kualidade di’ak, uza ba futuru ne’ebé ke naruk liu, to’o ami-nia vida remata iha mundu, atu nune’e komunidade mós senti ukun-aan ne’e kontenti, sente iha naroman,” nia kestiona.

Xefe suku Saburai, Abel Manu Mali, konsidera instalasaun enérjia eletrisidade hosi empreza konstrutora ne’e ladún iha kualidade di’ak.

“Ita bele dehan la profisionál, tanba estraga fila-fali ba komunidade nia sasan eletrónika hanesan talis cas, sasan ne’e terbakar hotu, dalaruma tékniku sira-ne’ebé mak instala ahi ne’e ladún iha kualidade,” nia hateten.

Nia husu Eletrisidade Timor-leste, Empreza Públika (EDTL,EP) munisípiu Bobonaro no empreza konstrutora atu tama responsablidade hodi estabiliza fali enérjia elestrisidade ne’e iha tempu badak.

“Hau-nia povu nafatin hein ho pasiénsia, ami hein semana ida, kuandu laiha mudansa ha’u hamutuk ho ha’u-nia povu, joven atu kontinua ezije ba parte relevante,” nia tenik.

Projetu eletrifikasaun nasionál ne’e foin kobre uma-kain 39, maibé seidauk kobre uma-kain 79.

Notísia relevante: AMB sei orienta PNTL atua individu impede projetu eletrifikasaun iha Saburai

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!