iklan

EKONOMIA, BOBONARO, HEADLINE, MUNISÍPIU

AMB sei orienta PNTL atua individu impede projetu eletrifikasaun iha Saburai

AMB sei orienta PNTL atua individu impede projetu eletrifikasaun iha Saburai

Prezidente Autoridade Munisípiu Bobonaro, Ernesto de Oliveira Barreto. Imajen espesiál.

DILI, 20 dezembru 2022 (TATOLI)-Autoridade Munisipál Bobonaro (AMB), Ernesto de Oliveira Barreto, sei orienta Polísia Nasionál Timor-Leste (PNTL) Munisípiu Bobonaro atua individu  ne’ebé hakarak impede projetu eletrifikasaun iha suku Saburai, postu administrativu Maliana ho distánsia kilómetru hitu ne’ebé daudaun ne’e responsabiliza hosi empreza Imelvendrik Unipesoál Lda.

Prezidente Autoridade Munisípiu Bobonaro Ernesto de Oliveira Barreto, hato’o asuntu ne’e hafoin ho  administradór postu Maliana, Tomás Laco-Loe no komandante PNTL munisípiu Bobonaro, Superintendente Antoninho Mauluta,  Segunda ne’e halo enkontru ho autoridade lokál, veteranu, lia-na’in no komunidade sira oinsá rezolve problema kompañia Genusuma impede kompañia Imelvendrik Unipesoál Lda reponsabiliza projetu ne’e.

Lideransa munisípiu ne’e halo intervensaun ba  problema ne’e ho objetivu atu asegura projetu kontinua la’o tanba legalmente kompañia rua ne’ebé implementa hela obra ne’e mak asina ona kontratu ho governu liuhosi Eletrisidade Timor-Leste, Empreza Públika (EDTL,E.P) hahú hosi fulan-marsu to’o loron 10 fulan-setembru tinan 2022 ho nia kustu $382,765.99.

Notísia relevante: Projetu eletrifikasaun neen iha Bobonaro tama faze implementasaun

Ernesto de Oliveira Barreto rekoñese iha governasaun anteriór kompañia Genusuma konsege hari ona ai-rin eletrisidade hahú hosi suku Tapo-Memo ba to’o Saburai maibé la konsege implementa obra tamba seidauk iha orientasaun ho baze legál ruma, no  iha mandatu VIII governu empreza Imelvendrik joint venture ho Daren Unipesoál Lda mak selesionadu iha konkursu públiku.

Ho nune’e nia afirma, kompañia manán-na’in  iha direitu tomak atu responsabiliza obra ne’e to’o finaliza tuir kontratu serbisu ne’ebé asina ona, tanba povu suku Saburai hein hela eletrisidade durante tinan barak ona.

“Nia iha kompañia tuir prosesu legál, hala’o ba, la taka dalan, maibé kuandu la manán, tanba de’it ita mak veteranu, ita mak maun-boot ita atu halo impedimentu hotu, ha’u hanesan Prezidente Autoridade sei la konkorda, bainhira parte rua ne’e sei iha problema. Prezidente autoridade sei intrega ba seguransa, laiha dalan seluk,” nia informa ba jornalista sira, iha sede suku Saburai.

Xefe suku Saburai, kontente no agradese ba prezidente autoridade munisípiu ho parte seguransa konsege solusiona ona problema ne’e.

“Ami la’o-tuir kompañia ne’ebé iha baze legál, ha’u hanoin ba oin laiha tán ema ida mak atu halo impedimentu, ha’u sei la rekoñese se laiha karta legál,projetu sei kontinua la’o nafatin tanba ha’u-nia komunidade desde ukun-an to’o agora seidauk aseseu eletrisidade,” nia hateten.

Enkuantu iha tinan 2015 mak governu foin instala enérjia solár painél ba komunidade Uma-kain 217 hodi fó roman iha tempu kalan atu uza ba nesesidade ne’ebé presiza.

Suku Saburai iha aldeia tolu komposta hosi aldeia Kosal, Mabil-oa no Ai-Tasi ho  totál na’in-2.696 no uma-kain  hamutuk 290-resin.

Notísia relevante: Projetu eletrifikasaun iha Saburai tama ona faze mobilizasaun rekursu materiál

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!