BOBONARO, 09 fevereiru 2023 (TATOLI)-Membru Komisaun E Parlamentu Nasionál ne’ebé trata asuntu Infraestrutura, Deputadu Marcos Xavier, husu ba Eletrisidade Timor-Leste, Empreza Públika, atu kontrola beibeik projetu eletrifikasaun iha suku Saburai, postu administrativu Maliana, munisípiu Bobonaro.
Deputadu Marcos, hato’o apelu ne’e ba Koordenadór EDTL,E.P Munisípiu Bobonaro, Mário de Jesus tanba foin lalais iha kompañia no grupu balun tenta impede projetu refere.
Notísia relevante: AMB sei orienta PNTL atua individu impede projetu eletrifikasaun iha Saburai
“Projetu ida Saburai ne’e la’o hela ka lae, Saburai ne’e iha fronteira, ne’ebé ema mota sorin nia lakan kapaas, fronteira Saburai ne’e kleur ona la lakan, ha’u hanoin ida-ne’e tenke tau atensaun ne’e tanba liña ida hosi Memo ne’e ba to’o Sasa,” nia levanta asuntu ne’e durante halo audiénsia ho kargu xefia sira iha administrasaun Bobonaro, kinta ne’e.
Hatán ba preokupasaun ne’e, Koordenadór EDTL,E.P, Munisípiu Bobonaro, Mário de Jesus, rekoñese mosu impedimentu maibé daudaun ne’e kontinua implementa hosi kompañia Imelvendrik Unipesoál Lda.
“Karta ami hato’o tiha ba PNTL no prezidente autoridade katak, kompañia ne’ebé mak atu impede tán, ami sei entrega ba parte seguransa atubele atua,” nia afirma.
Komunidade Saburai ne’ebé durante tinan 20-resin ona seidauk asesu enérjia elétrika hamutuk 2.972 ho totál xefe-família 711, komposta hosi aldeia Tas-Masak, Cosal no Mabiloa.
Notisia relevante: Komunidade Saburai seidauk asesu eletrisidade
Jornalista: Sérgio da Cruz
Editór: Evaristo Soares Martins
