DILI, 26 juñu 2024 (TATOLI)–Ministériu Edukasaun (ME) liuhusi Diretór Jerál Ensinu Sekundáriu Jerál (ESJ), Deolindo da Cruz, orienta Servisu Edukasaun Munisípiu (SEM) sira atu koordena ho dirijente eskola atu esforsu másimu, nune’e bele realiza ezame segundu períodu ho di’ak.
“Ita prepara no orienta ona Diretór Servisu Edukasaun Munisípiu sira nune’e koordena ho profesór ho Diretór Eskola atu nune’e oinsá profesór sira bele prepara elabora pontu ezame ne’e, nune’e realiza ezame segundu períodu ho susesu no di’ak liután,” Diretór informa ba Agência Tatoli, iha ninia knaar fatin, Vila-Verde, kuarta ne’e.
Aleinde prepara pontu ezame, diretór eskola sira presiza reforsa tan ba matéria balun ne’ebé nia profesór laiha.
“Hafoin ba eskola sira-ne’ebé profesór laiha ne’e buka meiu hodi halo ezersísiu ida hodi reforsa ba matéria ne’ebé profesór laiha,” nia akresenta.
Notísia relevante : Konsensaun eskolár tarde difikulta ezame
Iha sorin seluk, Diretór foun sira foin mak hetan nomeasaun, tanba ne’e sei haree kona-ba konsensaun eskolár.
“Ohin dadeer ami ko’alia ona kona-ba konsensaun eskolár ne’e, maibé manuál foin aprova tanba ita foin mak halo nomeasaun ba dirijerente foun,” nia tenik.
Antes ne’e, Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, informa, ME iha loron 13 juñu sei bolu diretiva sira mai atu fó orientasaun serbisu.
Iha enkontru ne’e diretiva sira mai lori ho sira-nai eleitorál hodi bele prosesa ona osan, nune’e bele transfere ona ba eskola hodi bele realiza ida-idak ninia atividade.
“Sira lori kedas ho eleitorál mai nune’e semana oin osan konsensaun eskolár ne’e tama ona iha konta bankária eskola ida-idak. Ita fó prazu semana ida atu rezolve situasaun hirak ne’e. Ida-ne’e ba nível eskolaridade. Molok ba segundu períodu, konsensaun eskolár ne’e tama ona ba konta bankária ida-idak, osan tama ona no sira loke konta bankária distribui ona,” nia salienta.
Jornalista : Osória Marques
Editora : Julia Chatarina
