DILI, 28 juñu 2024 (TATOLI)-Prezidente Komisaun Funsaun Públika (KFP), Agostinho Letêncio, garante prosesu teste faze daruak ba bolsa kandidatu profesór ho totál aplikante hamutuk 7.468 sei la’o ho transparánsia.
“Ita hotu hatene katak prosesu selesaun ida-ne’e KFP hakarak garante buat ida transparánsia, hakarak garante katak prosesu selesaun ida-ne’e sei la bazeia ba interese sé sé nian de’it, sei laiha nepotizmu, ita sei laiha famíliarizmu, no garante de’it katak prosesu ida ne’e ita-boot sira rasik mak sei define katak ita-boot sira pasa ka la pasa liuhusi komputadór ne’ebé iha,” Agostinho Letêncio, hateten asuntu ne’e bainhira halo abertura ba teste bolsa kandidatu profesór faze daruak, iha KFP Obrigadu Barak, sesta ne’e.
Notísia Relevante :Aplikante bolsa rekrutamentu ba profesór 13.021 admitidu atu tuir teste eskrita
Komisaun Funsaun Públika kria ona kondisaun no fasilidade ne’ebé adekuadu no seguruhodi fasilita kandidatu sira atu tuir izame ho di’ak hodi priense vaga hamutuk 2.499 nune’e bele hanorin estudante sira iha ensinu báziku primeiru no segundu siklu.
“Tanba ita laiha ona interese sira seluk, ita laiha ona rekomendasaun, fasilidade hotu ne’ebé KFP prepara atu responde ba transparánsia no kualidade atu halakon tiha buat ida ne’ebé bolu dehan nepotizmu, familiarizmu no interese privadu,” nia hateten.
Tuir -nia rezultadu teste dahuluk bolsu kandidatu profesór nian ne’ebé maka hala’o ona iha fulan hirak kotuk nota katak kandidatu barak maka la pasa tanba laiha preparasaun didi’ak kona-ba materia
“Dalabarak mós ami dehan sala ne’e husi ita-boot sira, tanba dalabarak ita-boot sira ladun lee, ladún prepara, ami fasilita prosesu lubuk ida (kisikisi) iha pájina ME kona-ba ba área hotu ne’ebé iha. Ne’ebé laiha razaun bainhira imi dehan ami laliu tanba KFP uza komputadór mak teste. Tanba ne’e mak ami enkoraja kandidatura sira atu bele partisipa ho didi’ak, atu pasa ne’e utiliza didi’ak oras ne’e, no priense ho atensaun tomak, karik hotu haree filafali nune’e bele hetan valór ne’ebé di’ak,” nia informa.
Tuir polítika Governu Konstitusionál dasia, sei implementa reforma obrigatóriu ba profesór sira ne’ebé maka atinje ona idade reforma 60, maibé oras ne’e sei kontinua hanorin tanba menus profesór, nune’e ho rekrutamentu profesór foun sira sei subtitui ona profesór reformadu sira iha futuru.
Iha biban hanesan Reprezentante hosi Ministra Edukasaun, Domingos Lopes Lemos, hateten objetivu hosi rekrutamentu foun ba profesór sira ne’e atu priense vaga hamutuk 2.499 ne’ebé maka ME planea ona atu rekruta iha tinan 2024.
“Lista profesór ne’e sei uza hodi priense vagas kuadro pessoál ne’ebé kada eskola ensinu báziku presiza. Ne’e hanesan marku importante iha ita-nia kompromisu kontinua ho edukasaun no dezenvolvimentu kualidade profesór nian,” nia dehan.
Nia dehan teste ba kandidatu sira ne’e importante atu garante kualidade edukasaun ihaTimor-Leste, tanba ne’e labele tau iha pensamentu ida katak teste hanesan oportunidade atu hetan de’it servisu.
“Lembra katak, kada ida husi ita iha potensiál atu halo diferensa iha vida estudante sira-nian no iha kualidade edukasaun iha ita-nia nasaun. Konkursu ne’e la’ós de’it oportunidade ba ita maibé mós ba futuru edukasaun Timor-Leste nian. Ha’u fiar katak kada kandidatu ida-ne’e prepara ona atu hetan pontu mínimu no hetan iha lista espera profesór nian,”nia tenik.
Entertantu, totál aplikante ne’ebé mak daudaun ne’e tuir teste faze daruak bolsa kandidatu profesór hamutuk 7.468, kompostu husi feto 4.508 no mane 2.960 ne’ebé maka tuir prova fazeadamente hahú husi loron 28 fulan-juñu to’o jullu 2024.
Tuir kuadru pesoál ministériu no despaisu ministeriál númeru 19/2024 13 maiu ne’ebé fó sai ona husi ME katak, ensinu báziku primeiru no segundu siklu ne’e presiza profesór hamutuk 800. Maibé Ministériu Edukasaun iha ona planu atu rekruta profesór iha tinan ne’e hamutuk 2.400 vaga ho ninia totál orsamentu hamutuk $ 14.390-resin.
Notísia Relevante :Eskola Sekundária Jerál Suai presiza profesór atu hanorin dixiplina lima
Jornalista : Osória Marques
Editór : Agapito dos Santos
