DILI, 08 jullu 2024 (TATOLI)—Institutu Kualidade Timor-Leste, Institutu Públiku (IQTL, I.P, sigla portugés) liuhusi Departamentu Kualifikasaun, fulan ne’e, hahú halo ona levantamentu dadus ba produtu lokál sira ne’ebé mak produtór sira prodús no fa’an iha munisípiu hotu.
Prezidente IQTL, I.P, Rosito de Sousa Monteiro, hateten, objetivu husi atividade ne’e hodi iha futuru departamentu relevante bele define no identifika produsaun sira ninia kualidade.
“Ita foti dadus produtu lokál hotu ne’ebé ita-nia agrikultór sira prodús no ita-nia empreza sira ne’ebé halo produsaun ba produtu lokál sira iha munisípiu sira ne’e hotu atu hatene ita-nia poténsia produtu ne’ebé halo esportasaun no konsumu iha rai-laran,” Rosito Monteiro, informa ba Agência Tatoli, iha ninia knaar fatin, Timor Plaza, segunda ne’e.
Nia konsidera, levantamentu dadus ne’e importante tanba bainhira laboratóriu estabelese ona sei define sasán nia kualidade atu sertifika molok halo esportasaun no konsumu interna.
“Bainhira iha produtu sira ne’ebé ita halo ona levantamentu dadus, la’ós atu define hotu-hotu maibé bele haree ida ne’ebé mak prioridade liu atu sertifika hodi haruka ba rai-li’ur. Ita tenta halo análiza ba konsumu interna hodi asegura bainhira ema konsumu bele di’ak ba saúde,” nia akresenta.
Notísia relevante : IQTL, I.P lori produtu lokál tolu teste iha rai-li’ur iha tinan 2023
Daudaun halo ona konkursu públiku ba laborátoriu, nune’e empreza manán-na’in sira bele halo akizisaun ba ekipamentu halo teste ba produtu hanesan mina, bee no kafé. Nune’e mós, iha iha tempu badak Organizasaun Nasaun Unida ba Dezenvolvimentu (UNIDO) sei apoiu uluk ekipamentu kalibrasaun.
Molok estabelese laboratóriu, presiza foti uluk dadus tanba durante ne’e setór privadu sira ne’ebé halo atividade esportasaun, tenke husu na’in ba produtu lori amostra halo teste iha rai-li’ur no bainhira hetan rezultadu di’ak mak foin halo esportasaun.
“Ida-ne’e mak ita iha responsabilidade atu kria infraestrutura ida-ne’ebé mak natoon hodi asegura ita-nia setór privadu sira bele kontinua halo sira-nia esportasaun,” Jerente instititu tenik.
Atividade levantamentu dadus ne’e rasik hala’o durante fulan-tolu no bainhira finaliza ona sei fó sai rezultadu.
Ekipa halo levantamentu dadus iha terrenu hanesan produsaun agrikultór, kooperativa, estabelesimentu komersiál sira loke iha munisípiu sira. Dadus ne’ebé foti husu produtu poténsia ne’ebé mak haruka ba rai-liur no konsumu iha rai-laran.
Atividade ne’e loloos hala’o antes ona maibé tanba funsionáriu IQTL, I.P foin asina kontratu iha fulan-juñu ne’e maka atividade ne’e foin hala’o.
Daudaun ne’e IQTL, I.P akumula funsionáriu hamutuk 40-resin hodi hala’o programa no atividade instuitu.
Jornalista : Arminda Fonseca
Editora : Julia Chatarina
