DILI, 23 janeiru 2024 (TATOLI)–Institutu Kualidade Timor-Leste, Institutu Públiku (IQTL, I.P, sigla portugés) konsege lori produtu lokál tipu tolu halo teste iha laboratóriu Lembaga Badan Pengawas Obat da Makanan (BPOM), Indonézia durante tinan 2023.
“Produtu lokál tolu ne’e mak hanesan masin, tua barique no bee. Bee ne’e empreza lokál ida hosi Baucau, sira iha faze preparasaun atu halo produsaun ba bee hemu nian, entaun sira lori uluk amostra hodi halo teste, bainhira hetan rezultadu di’ak mak sira bele kontinua prosesamentu,” Prezidente IQTL, Rosito de Sousa Monteiro, informa ba Agência Tatoli, iha Ministériu Finansa, Aitarak-laran, tersa ne’e.
Aleinde ne’e, iha mós pedidu balun hanesan coconut oil hodi haruka ba teste, maibé tanba antes besik ona tinan 2023 ramata entaun la konsege, maibé daudaun iha hela prosesu komunikasaun ho laboratóriu BPOM.
“Rezultadu teste laboratóriu produtu tolu ne’e, masin mak iha problema oitoan tanba ninia kualidade ladun di’ak, maibé tua barique no bee ne’e rasik rekomendasaun hosi laboratóriu katak kualidade di’ak no seidauk iha kontaminasaun ho produtu kímiku,” nia esplika.
Notísia relevante : IQTL apresia serbisu IPB deskobre formalin iha na’an importasaun sira
Responsável institutu públiku ne’e relata, reabilitasaun laboratóriu IQTL daudaun iha ona progresu no tuir kontratu sei finaliza iha marsu 2024.
“Bainhira finaliza bele utiliza halo teste ba produtu sira hodi haree kualidade, maski nune’e ita iha ona rekursu naton maibé presiza haree iha regulamentu ruma regula tékniku sira ne’ebé sei serbisu iha laboratóriu,” nia tenik.
Tanba ne’e, IQTL iha permisaun katak iha jullu 2024 hahú operasionaliza ona laboratóriu ne’e rasik, maski reabilitasaun ramata iha marsu, maibé sei halo lai instalasaun ba ekipamentu sira inklui kondisaun laboratóriu hodi asegura instrumentu iha laboratóriu ne’e nia laran.
Laboratóriu ne’e lokaliza iha aldeia Boa Morena, suku Motael, postu administrativu Vera Cruz, munisípiu Dili, hosi empreza lokál, Babankeli ho valór kustu projetu rihun $98 (orsamentu 2023).
Jornalista : Antónia Gusmão
Editora : Julia Chatarina
